ప్రభాస్ సినిమా కోసం ఆ ముగ్గురు

ఇంకొన్ని రోజుల్లోనే యంగ్ రెబల్ స్టార్ ప్రభాస్ కు విడుదల లభించనుంది. దాదాపు నాలుగేళ్లుగా ‘బాహుబలి’కి అంకితమైపోయి ఉన్న ప్రభాస్.. ఎట్టకేలకు ఈ నెల చివరి వారంలో ఆ సినిమాలో తన పని ముగించబోతున్నాడు. కొన్ని రోజుల పాటు విశ్రాంతి తీసుకుని.. కొత్త ఏడాదిలో తన కొత్త సినిమాను మొదలుపెట్టబోతున్నాడు ప్రభాస్.

రెండేళ్ల కిందటే ప్రభాస్ తన తర్వాతి సినిమాను ‘రన్ రాజా రన్’ ఫేమ్ సుజీత్ తో కమిటైన సంగతి తెలిసిందే. ఈ సినిమా అనుకున్న సమయానికి దాని రేంజ్ తక్కువే. కానీ గత రెండేళ్లలో ‘బాహుబలి’ పుణ్యమా అని ప్రభాస్ ఇమేజ్ అమాంతం పెరిగిపోయింది. అతను నేషనల్ స్టార్ అయిపోయాడు. ఈ నేపథ్యంలో ఈ సినిమా బడ్జెట్ బాగా పెరిగింది. వంద కోట్లకు పైగా బడ్జెట్లో త్రిభాషా చిత్రంగా ఈ చిత్రాన్ని తెరకెక్కించనున్నారు.

తెలుగుతో పాటు హిందీ.. తమిళ భాషల్లోనూ ఈ చిత్రం తెరకెక్కనుంది. అందుకే అన్ని ఇండస్ట్రీలకూ పరిచయమున్న సంగీత దర్శక త్రయం శంకర్-ఎహసాన్-లాయ్ లను ఈ సినిమాకు ఎంచుకున్నట్లు సమాచారం. ఈ ముగ్గురూ హిందీలో ఎన్నో మ్యూజికల్ హిట్లు ఇచ్చారు. తెలుగులోనూ ‘కొంచెం ఇష్టం కొంచెం కష్టం’ సినిమాతో ఆకట్టుకున్నారు. ప్రభాస్ సినిమా కోసం చాలామందిని పరిశీలించి.. చివరికి ఈ ముగ్గురికే సంగీతం బాధ్యతలు అప్పగించాడు సుజీత్. జేమ్స్ బాండ్ తరహా యాక్షన్ థ్రిల్లర్ కథాంశంతో తెరకెక్కబోయే ఈ చిత్రాన్ని యువి క్రియేషన్స్ నిర్మించనుంది.

Like Us on Facebook : https://www.facebook.com/Tupakidotcom/