సోనూ త‌గ్గేదీ లేదంటున్నారే!

బాలీవుడ్ సింగర్ సోనూ నిగ‌మ్ ఇప్పుడు వార్త‌ల్లో వ్య‌క్తిగా నిలిచారు. అదేదో గాత్ర‌మో, సంగీతం విష‌యానికో కాదు. స‌మాజంలో పెను వివాదానికి తెర తీసే ప్ర‌మాద‌మున్న ఆల‌యాల మీద‌. నిజంగా ఈ త‌ర‌హా వ్య‌వ‌హారాల్లో అనుచిత వ్యాఖ్య‌లు చేసి... వాటికి తాము క‌ట్టుబ‌డి ఉన్నామ‌ని చెప్పే వ్య‌క్తులు దాదాపుగా మ‌న‌కు క‌నిపించ‌రు. అయితే గాత్రంతోనే దేశ‌వ్యాప్తంగా త‌న‌కంటూ ఓ గుర్తింపు తెచ్చుక‌న్న సోనూ నిగ‌మ్ మాత్రం ఈ వ్య‌వ‌హారంలో నిండా మునిగేందుకే సిద్ధ‌ప‌డ్డ‌ట్లుగా ఉంది.

న‌లుదిక్కుల నుంచి తాను చేసిన వ్యాఖ్య‌ల‌పై విమ‌ర్శ‌లు వెల్లువెత్తుతున్నా కూడా ఏమాత్రం వెర‌వ‌కుండా స‌ద‌రు వ్యాఖ్య‌ల‌కు మ‌రింత‌గా ఆజ్యం పోస్తున్న‌ట్లుగా సోనూ చేసిన వ్యాఖ్య‌లు ఇప్పుడు దేశవ్యాప్తంగా ఆస‌క్తి రేకెత్తిస్తున్నాయి. ఇక అస‌లు విష‌యంలోకి వెళితే... మ‌సీదులు, దేవాల‌యాలు, గురుద్వారాల్లో పెద్ద సౌండ్‌తో వినిపిస్తున్న లౌడ్ స్పీక‌ర్ల‌పై సోనూ త‌న ట్విట్ట‌ర్ ఖాతాలో ఘాటు వ్యాఖ్య‌లు చేశారు.

అయినా ప్రార్థ‌నా మందిరాల్లో లౌడ్ స్పీక‌ర్ల‌తో కూడిన మైకులెందుకంటూ సోనూ నిన్న సంచ‌ల‌న వ్యాఖ్య‌లు చేసిన సంగ‌తి తెలిసిందే. ఈ వ్యాఖ్య‌ల‌పై అన్ని వ‌ర్గాల నుంచి పెద్ద ఎత్తున విమ‌ర్శ‌లు చెల‌రేగాయి. ఈ వివాదానికి తానే కేంద్రంగా నిలిచాన‌న్న విష‌యం తెలిసినా... త‌న‌పై అన్ని కోణాల్లో నుంచి విమ‌ర్శ‌లు వెల్లువెత్తుతున్నాయ‌న్న విష‌యం తెలిసినా కూడా సోనూ ఏమాత్రం త‌గ్గ‌లేదు. త‌న‌పై విమ‌ర్శ‌లు ఏ స్థాయిలో వెల్లువెత్తాయో... అంతే స్థాయిలో సోనూ కూడా త‌న స్వ‌రం పెంచారు. ప్రార్థ‌నా మందిరాల్లో తాను చేసిన వ్యాఖ్య‌ల‌కు ఇప్ప‌టికీ తాను కట్టుబ‌డి ఉన్నాన‌ని సోనూ తాజాగా ట్వీటారు.

అయినా త‌న‌పై వెల్లువెత్తిన విమర్శ‌ల‌పై త‌న స్టైల్లో రెచ్చిపోయిన సోనూ... విమర్శ‌కుల ఐక్యూను వారి కామెంట్లే బ‌య‌ట‌పెట్టాయ‌ని కొత్త కామెంట్‌ను పోస్ట్ చేశారు. ఈ త‌ర‌హా విమ‌ర్శ‌లు గుప్పించే వారి ఐక్యూ... వారిలోని హిపోక్ర‌సీకి అద్దం ప‌డుతోంద‌ని కూడా సోనూ సంచ‌ల‌న వ్యాఖ్య‌లు చేశారు. ఈ వివాదంపై మ‌రింత ర‌చ్చ జ‌రిగే అవ‌కాశాలున్న‌ట్లు విశ్లేష‌ణ‌లు సాగుతున్నాయి. అయినా తానేమీ లేని అంశాల‌ను ప్ర‌స్తావించ‌లేద‌ని, ఉన్న నిజాన్ని మాత్ర‌మే చెప్పాన‌ని కూడా సోనూ పేర్కొన్నాడు.