ఒక్క మొదటి సినిమా విడుదల వాయిదా మినహా సాయి ధరమ్ తేజ్ మిగతా విషయాలు చూస్తే నక్క తోక తొక్కి వచ్చాడా..? అనే అనుమానం కలగక మానదు. ప్రస్తుతం మెగా కాంపౌండ్ లోనే ఎవరికీ లేనన్ని సినిమాలు సాయి ధరమ్ చేతిలో వున్నాయంటే ఏమనుకోవాలి మరి.. తాజాగా హరీష్ శంకర్ దర్శకత్వం వహించిన సుబ్రమణ్యం ఫర్ సేల్ సినిమాతో త్వరలో ప్రేక్షకుల ముందుకు రానున్నాడు.
ఈ సినిమాకి సంబంధించిన టైటిల్ సాంగ్ ఈ రోజు రేడియో మిర్చిలో విడుదల చేశారు. నిజానికి ఆడియో రిలీజ్ రోజునే పాటలన్నీ విడుదల చేస్తారు. అయితే పబ్లిసిటీ రోజు రోజుకీ కొంతపుంతలు తొక్కుతోంది. అందులోనూ దిల్ రాజు చేసే పబ్లిసిటీ గురించి ప్రత్యేకంగా చెప్పాలా..? ఇక పాట విషయానికొస్తే టైటిల్ సాంగ్ గా చెప్పుకుంటున్న ఈ పాటని 'బాధలో సరదా కూడా సేల్' అంటూ చాలా అర్థవంతంగా వనమాలి రాశారు.
'అరె చమక్ చమక్' అంటూ సాగే ఈ పాటని మిక్కీ జే మేయర్ స్వరపరిచారు. మేలోడీలనుండి మిక్కీ కొంచెం కొంచెంగా బయటపడుతున్నట్టు ఈ పాట చెబుతోంది. కన్నీళ్లు కూడా అమ్ముడు పోతున్నయంటూ సున్నితంగా చెప్పే ప్రయత్నం చేశారు ఈ పాటలో. ఈ పాటని చూస్తుంటే ఈ సినిమా ఆడియో బాగానే సేల్ అయ్యేలా వుంది. ఇక మెగా అభిమానులు ఆశించే స్టెప్పుల విషయంలో సాయి ధరమ్ కుమ్మేశాడని దర్శకుడు హరీష్ శంకర్ తెలియజేశాడు. అవి చూడాలంటే మరికొన్ని రోజులు ఆగాల్సిందే.