శిల్పకు మద్దతు పెరుగుతోంది

వ్యాపారవేత్త రాజ్ కుంద్రా పోర్నోగ్రఫీ వ్యవహారంలో అరెస్ట్‌ అయిన విషయం తెల్సిందే. ఆయన వ్యాపారవేత్త ముసుగులో చాలా మందిని మోసం చేశాడని.. ఆయన వల్ల ఎంతో మంది ఇబ్బంది పడ్డారు అనేది చాలా మంది మాట. ఆ విషయం ఇప్పుడు సోషల్‌ మీడియాలో వైరల్‌ అవుతోంది. రాజ్ కుంద్రా వల్ల ఆయన భార్య శిల్పా శెట్టిని కూడా సోషల్‌ మీడియాలో ట్రోల్‌ చేస్తున్నారు. రాజ్ కుంద్రా అంతగా మోసాలకు.. నేరాలకు పాల్పడుతున్న సమయంలో శిల్పా శెట్టి ఏం చేస్తుందంటూ చాలా మంది విమర్శలు చేస్తున్నారు. మీడియాలో కూడా శిల్పా శెట్టికి వ్యతిరేకంగా కథనాలు వస్తున్నాయి. సుదీర్ఘ కాలంగా పెంచుకుంటూ వచ్చిన ఆమె క్రేజ్‌.. ఇమేజ్‌ ఒక్కసారిగా కుప్పకూలినట్లయ్యింది.

తనపై మీడియాలో వస్తున్న కథనాలను ఆపాలంటూ విజ్ఞప్తి చేస్తు ఇప్పటికే ఆమె కోర్టుకు వెళ్లింది. కోర్టులో ఆమె కు వ్యతిరేకంగా తీర్పు వచ్చింది. మీడియాకు ఆమె పదే పదే విజ్ఞప్తి చేసింది. మళ్లీ మళ్లీ మీరు నా విషయంలో తప్పుడు కథనాలు ప్రచురితం చేయవద్దంటూ విజ్ఞప్తి చేసినా కూడా ఆమెను మాత్రం మీడియాలో ఇష్టానుసారంగా విమర్శలు చేస్తూ కొందరు వ్యక్తిగతంగా కూడా దూషిస్తున్నారు. దాంతో ఆమెకు కొందరు సినీ వర్గాల వారు మద్దతు నిలుస్తున్నారు. మీడియాలో వస్తున్న కథనాలను మరియు సోషల్‌ మీడియాలో ఆమెపై వస్తున్న కామెంట్స్‌ కు వ్యతిరేకంగా కొందరు సెలబ్రెటీలు సోషల్‌ మీడియా ద్వారా స్పందిస్తున్నారు.

ఇప్పటికే శిల్పా శెట్టి కి మద్దతుగా మాధవన్ నిలిచాడు. నువ్వు శక్తివంతమైనదానివి. ఖచ్చితంగా నీకు దేవుడు శక్తిని ఇస్తాడని ఆశిస్తున్నాను అన్నాడు. ఇంకా కొందరు బాలీవుడ్‌ ప్రముఖులు కూడా మీడియాలో వస్తున్న వార్తలు కొన్ని రోజులకే పరిమితం మళ్లీ మీరు మీ స్థాయిని చేరుకుంటారు.. మీరు దేనికి అర్హులో అన్నింటిని దక్కించుకుంటారు అంటూ నమ్మకం వ్యక్తం చేశారు. కేవలం సెలబ్రెటీలు మాత్రమే కాకుండా శిల్పాకు మద్దతుగా కొందరు సామాన్యులు కూడా మద్దతుగా నిలుస్తున్నారు. ఆమె స్థాయిని కించ పర్చుతూ ఆమెను వ్యక్తిగతంగా విమర్శించడం అస్సలు భావ్యం కాదు. ఆమె పిల్లలు మరియు ఆమె వ్యక్తిగతం గురించి అయినా ఆమెకు గౌరవం ఇవ్వాలని కొందరు అభిప్రాయం వ్యక్తం చేస్తున్నారు.