ఈ దసరా పండగ నాటికి మూడు సినిమాలు థియేటర్లకొచ్చాయి. వాటిలో ఎన్టీఆర్ జైలవకుశ ముందే రిలీజ్ కావడంతో భారీగానే కలెక్షన్లు రాబట్టింది. మీడియం బడ్జెట్లో వచ్చిన మహానుభావుడు మొదటి వారానికే బ్రేక్ ఈవెన్ కు వచ్చేశాడు. ఎటొచ్చీ భారీ బడ్జెట్ తో తెరకెక్కిన స్పైడర్ మాత్రం అనుకున్న లక్ష్యాన్ని చేరలేకపోయింది.
పండగ హడావుడి ముగిసి కొత్త సినిమాల హడావుడి తగ్గడంతో థియేటర్లలోనూ సందడి తగ్గింది. ఈ నేపథ్యంలో రాబోయే సినిమాలపైనే అందరి దృష్టి ఉంది. ఈ నెలలో పెద్ద సినిమాలు మూడు మాత్రమే థియేటర్లకు రాబోతున్నాయి. ఈ మూడు కూడా పోటీ లేకుండా వారానికి ఒకటి చొప్పునే థియేటర్లకు వస్తుండటం విశేషం. ముందుగా 12న నాగార్జున హీరోగా ఓంకార్ దర్శకత్వంలో తెరకెక్కిన రాజుగారి గది-2 థియేటర్లకు రాబోతోంది. ఇది థ్రిల్లర్ జోనర్ లో తెరకెక్కిన సినిమా కావడం.. హీరో నాగార్జున తొలిసారి ఈ తరహా పాత్ర చేస్తుండటంతో ఈ సినిమాపై బజ్ బాగానే ఉంది. దీనితర్వాత వారం వ్యవధిలో (19న) మాస్ మహరాజా రవితేజ లాంగ్ గ్యాప్ తర్వాత నటించిన రాజా ది గ్రేట్ థియేటర్లకు రానుంది. ఆ తర్వాత వారం రోజులకు (27న) రామ్ హీరోగా నటించిన ఉన్నది ఒక్కటే జిందగీ సినిమా రిలీజవుతుంది.
ఈ మూడు సినిమాలతో పాటు కొన్ని లో బడ్జెట్ సినిమాలు కూడా థియేటర్లకు రానున్నాయి. అయితే వాటి ప్రభావం చాలా తక్కువనే చెప్పొచ్చు. వస్తున్న మూడు పెద్ద సినిమాలు పోటీ లేకుండా వస్తున్నందున టాక్ బాగుంటే వారం పాటు కంటిన్యూగా కలెక్షన్లు రాబట్టే అవకాశం ఉంటుంది. చూద్దాం.. వీటిలో ప్రేక్షకులను ఏ సినిమాలు ఎంతమేరకు ఆకట్టుకుంటాయో..