దగ్గుబాటి మల్టీస్టారర్ లేదా?

అక్కినేని వాళ్ల ‘మనం’ చూశాక సినీ పరిశ్రమలోని ప్రతి పెద్ద ఫ్యామిలీ కూడా తమకూ ఇలాంటి సినిమా ఒకటి ఉంటే బాగుండే అనుకుని ఉంటే ఆశ్చర్యమేమీ కాదు. ఐతే మిగతా ఫ్యామిలీల ఫీలింగ్స్ ఏవీ బయటికి రాలేదు కానీ.. దగ్గుబాటి ఫ్యామిలీ మాత్రం తాము కూడా ఇలాంటి ఓ కుటుంబ కథా చిత్రం చేద్దామనుకుంది. దాదాపు రెండేళ్లుగా ఇందుకోసం గట్టి ప్రయత్నాలే జరుగుతున్నాయి. ఓ దశలో రానా.. వెంకటేష్ వెళ్లి కేరళలో కూర్చుని స్టోరీ డిస్కషన్లలో పాల్గొన్నారు. అది వర్కవుటవ్వలేదు. ఆ తర్వాత కూడా సురేష్ బాబు చాలా స్టోరీలు పరిశీలించాడు. మంచి కథ దొరికితే.. ఇందులో ఓ రోల్ చేయడానికి నాగచైతన్య కూడా రెడీ అయ్యాడు. కానీ ఏదీ సెట్టవ్వలేదు.

తాజాగా ‘క్షణం’ సినిమాతో పరిచయమైన యువ దర్శకుడు రవికాంత్ పేరెపు రానా-వెంకీ కాంబినేషన్ కోసం ఓ కథ తయారు చేస్తున్నట్లు వార్తలొచ్చాయి. కానీ తాజా సమాచారం ప్రకారం ఆ ప్రాజెక్టు కూడా క్యాన్సిల్ అయిందట. ఈ మల్టీస్టారర్ కథ వర్కవుట్ కాకపోవడంతో రానా హీరోగా వేరే థ్రిల్లర్ కథ ఒకటి రెడీ చేశాడట రవికాంత్. అది రానాతో పాటు సురేష్ బాబును కూడా ఇంప్రెస్ చేయడంతో దానికే ఓటేశారు. త్వరలోనే ఆ సినిమా సెట్స్ మీదికి వెళ్లిపోనుంది. దీంతో మల్టీస్టారర్ కలకు మళ్లీ తెరపడ్డట్లే. ఏదో చేయాలి కాబట్టి చేసేయడం కాకుండా ‘మనం’ లాంటి ప్రత్యేకమైన మల్టీస్టారర్ చేద్దామన్నదే సురేష్ బాబు ప్లాన్. అయినా ఇలాంటి విషయాల్లో అస్సలు రాజీ పడరు. అందుకే ప్రస్తుతానికి మల్టీస్టారర్ పక్కకు వెళ్లిపోయినట్లే.

Like Us on Facebook : https://www.facebook.com/Tupakidotcom/