మహేష్ కి పోటీగా 2022 సంక్రాంతి బరిలో దిగే హీరోలు ఎవరు..?

సూపర్ స్టార్ మహేష్ బాబు ఇటీవలే 'సర్కారు వారి పాట' సినిమా షూటింగ్ స్టార్ట్ చేసిన సంగతి తెలిసిందే. చిత్రీకరణ ప్రారంభించి వారం కూడా కాలేదు అప్పుడే రిలీజ్ అనౌన్సమెంట్ కూడా ఇచ్చేశాడు. 2022 సంక్రాంతి బరిలో దిగుతున్నట్లు ప్రకటించేశారు. దీంతో మహేష్ కి పోటీగా సంక్రాంతి వార్ లో దిగే హీరోలెవరు అనేది ఆసక్తికరంగా మారింది. ప్రస్తుతం షూటింగ్ జరుపుకుంటున్న స్టార్ హీరోల సినిమాలను బట్టి చూస్తే వచ్చే ఫెస్టివల్ సీజన్ లో మహేష్ కి పోటీగా యంగ్ రెబల్ స్టార్ ప్రభాస్ - మెగాస్టార్ చిరంజీవి - యంగ్ టైగర్ ఎన్టీఆర్ దిగే అవకాశాలు కనిపిస్తున్నాయి.

ప్రభాస్ - 'కేజీఎఫ్' ఫేమ్ ప్రశాంత్ నీల్ కాంబినేషన్ లో రూపొందుతున్న 'సలార్' షూటింగ్ ఇటీవలే ప్రారంభమైంది. హోంబలే ఫిలింస్ బ్యానర్ పై విజయ్‌ కిరగందూర్‌ భారీ బడ్జెట్ తో నిర్మిస్తున్న ఈ యాక్షన్ ఎంటర్టైనర్ ని సంక్రాంతికి రిలీజ్ చేసే ఛాన్సెస్ ఉన్నాయి. అలానే మెగాస్టార్ చిరంజీవి హీరోగా మెహర్ రమేష్ దర్శకత్వంలో రానున్న 'వేదలమ్' రీమేక్ కూడా ఫెస్టివల్ సీజన్ ని టార్గెట్ చేయొచ్చు.

ఇక ఎన్టీఆర్ - త్రివిక్రమ్ శ్రీనివాస్ కాంబినేషన్ లో తెరకెక్కనున్న సినిమాని కూడా సంక్రాంతి బరిలో నిలిపే అవకాశాలు ఉన్నాయి. ఇదే కనుక నిజమై వచ్చే ఏడాది సంక్రాంతి సందర్భంగా ఈ మూడు సినిమాలు కూడా రాగలిగితే.. బాక్సాఫీస్ వద్ద మహేష్ బాబు - ప్రభాస్ - చిరంజీవి - ఎన్టీఆర్ మధ్య రసవత్తరమైన పోటీ ఏర్పడుతుందని చెప్పవచ్చు.