ఆ అమ్మాయి కోసం రోహిత్ కు యువీ వార్నింగ్!

భార‌త క్రికెట‌ర్లు-బాలీవుడ్ హీరోయిన్లు - మోడ‌ళ్లు....అప్ప‌టికీ ఇప్ప‌టికీ వ‌న్నె త‌ర‌గ‌ని ఈ ఎవ‌ర్ గ్రీన్ కాంబో గురించి ప్ర‌త్యేకంగా చెప్ప‌న‌వ‌స‌రం లేదు. టీమిండియా మాజీ కెప్టెన్ మ‌హ‌మ్మ‌ద్ అజ‌హ‌రుద్దీన్-సంగీతా బిజ్లానీ నుంచి విరాట్ కోహ్లీ-అనుష్క‌ల వ‌ర‌కు ఆ కాంబినేష‌న్ రిపీట్ అవుతూనే ఉంది.  టీమిండియా మాజీ కెప్టెన్ ధోనీ - యువ‌రాజ్ సింగ్ లు....బాలీవుడ్ బ్యూటీ దీపికా ప‌దుకొనే తో ప్రేమాయ‌ణం సాగించేందుకు పోటీ ప‌డ్డార‌ని అప్ప‌ట్లో పుకార్లు వ‌చ్చిన సంగ‌తి తెలిసిందే. ఆ విష‌యంలోనే వారిద్ద‌రికీ క్లాష్ వ‌చ్చింద‌ని రూమ‌ర్ ఉంది. అయితే, ఓ అమ్మాయి విష‌యంలో టీమిండియా ఓపెన‌ర్ రోహిత్ శ‌ర్మ‌కు యువీ వార్నింగ్ ఇచ్చాడ‌ట‌. ఈ విషయాన్ని స్వ‌యంగా రోహిత్ శ‌ర్మ వెల్ల‌డించాడు. ఆ అమ్మాయివైపు క‌న్నెత్తి కూడా చూడొద్ద‌ని యువీ గ‌ట్టిగా చెప్పేశాడ‌ని రోహిత్ అన్నాడు. ఓ ఇంట‌ర్వ్యూ సంద‌ర్భంగా త‌న ప్రేమాయ‌ణం గురించిన ఆస‌క్తిక‌ర‌ విష‌యాల‌ను రోహిత్ బ‌య‌ట‌పెట్టాడు.

వివిధ యాడ్ షూటింగ్ లు - ఈవెంట్ల‌ సంద‌ర్భంగా టీమిండియా క్రికెట‌ర్లు...కొంత‌మంది హీరోయిన్లు - మోడ‌ల్స్ ను క‌లుస్తుంటారు. అదే త‌ర‌హాలో 2008లో 'యువరాజ్ సింగ్ - ఇర్ఫాన్ ఫఠాన్‌ లతో కలిసి ఓ యాడ్ షూట్ సంద‌ర్భంగా రితిక‌ను తొలిసారి రోహిత్ చూశాడ‌ట‌. ఆమె వైపు క‌న్నార్ప‌కుండా చూడ‌డాన్ని గ‌మ‌నించిన యువీ ....రోహిత్ కు వార్నింగ్ ఇచ్చాడ‌ట‌. ఆమె నా చెల్లిలాంటిది....ఆమె వైపు త‌దేకంగా చూడ‌కు అని గ‌ట్టిగా హెచ్చరించాడట. అంత‌కుముందే యువీ - రితిక ఇద్ద‌రూ మంచి స్నేహితులు కావ‌డంతో యువీ ఆమెను ప్రొటెక్ట్ చేశాడ‌ట‌. దీంతో యువీపై కోప‌మొచ్చింద‌ని, కావాల‌నే ఆ రోజంతా ఆమెను చూస్తూనే ఉన్నాన‌ని రోహిత్ చెప్పాడు. అయితే, ఆ యాడ్ షూటింగ్ లో మాత్రం బాగా ప‌ర్ ఫార్మ్ చేయ‌లేక‌పోయాన‌ని అన్నాడు. అది గ‌మ‌నించిన రితిక త‌న వ‌ద్ద‌కు వ‌చ్చి సాయం చేసింద‌ని - అప్పుడు మొద‌లైన ప‌రిచ‌యం....ప‌రిణ‌యం వ‌ర‌కు వెళ్లింద‌ని రోహిత్ చెప్పాడు. అదే త‌ర‌హాలో ఓ యాడ్ షూట్ లో క‌లిసిన విరుష్క జంట కూడా తాజాగా పెళ్లిపీట‌లెక్క‌డం విశేషం. మ‌రి ప్ర‌స్తుత టీమిండియా ఆట‌గాళ్ల‌లో మ‌రెంత‌మంది....రోహిత్ - కోహ్లీల‌ను ఆద‌ర్శంగా తీసుకుంటారో వేచి చూడాలి మ‌రి! మ‌రోవైపు, ‘ఈమె నా లక్కీ ఛార్మ్‌’ అంటూ రితికతో దిగిన ఓ ఫొటోను రోహిత్ సోష‌ల్ మీడియాలో పోస్ట్ చేయడంతో అది వైరల్ అయింది. త‌మ సెకండ్ మ్యారేజ్ యానివ‌ర్స‌రీ (డిసెంబ‌రు 13)కి రితిక‌కు డ‌బుల్ సెంచ‌రీ - బ‌ర్త్ డే(డిసెంబ‌రు 24)కి ఫాస్టెస్ట్ సెంచ‌రీ ...రోహిత్ గిఫ్ట్ గా ఇచ్చిన సంగ‌తి తెలిసిందే. శ్రీ‌లంక‌ను రోహిత్ టార్గెట్ చేయ‌డంపై సోష‌ల్ మీడియాలో ర‌క‌ర‌కాల సెటైర్లు పేలుతున్నాయి. రితిక‌కు - రోహిత్ కు సంబంధించిన అన్నిస్పెషల్ డేట్ల‌ను శ్రీ‌లంక టీమ్ ముందుగానే తెలుసుకొని జాగ్ర‌త్త ప‌డుతోంద‌ని టీమిండియా అభిమానులు పెడుతున్న ఫొటోలు సోషల్ మీడియాలో వైర‌ల్ అవుతున్నాయి.