నాన్న గారు వజ్రోత్సవం, నాది స్వర్ణోత్సవం సంతోషం

తెలుగు జాతి గర్వించదగ్గ వ్యక్తి నందమూరి తారక రామారావు. సినిమా ఇండస్ట్రీలో ఆయన ఎంట్రీ సంచలనం, ఆయన తక్కువ సమయంలోనే తెలుగు సినిమా చరిత్రలో నిలిచి పోయే సినిమాలను చేయడం జరిగింది. ఆయన మొదటి సినిమా 'మనదేశం' విడుదల అయ్యి సరిగ్గా 75 సంవత్సరాలు పూర్తి అయింది. ఈనెల 24న మనదేశం సినిమా విడుదల అయ్యి 75 సంవత్సరాలు పూర్తి చేసుకున్న నేపథ్యంలో వజ్రోత్సవం జరుపుకుంటున్నారు. నందమూరి ఫ్యాన్స్‌ పలు చోట్ల సీనియర్‌ ఎన్టీఆర్‌ సినిమాలు ప్రదర్శిస్తూ వేడుకలు నిర్వహిస్తున్నారు.

సినిమా పరిశ్రమలో ఎన్టీఆర్‌ వజ్రోత్సవం జరుపుకుంటున్న ఈ ఏడాదిలోనే నందమూరి బాలకృష్ణ తన 50 ఏళ్లు పూర్తి చేసుకుని స్వర్ణోత్సవం జరుపుకున్నారు. ఇటీవలే బాలయ్య స్వర్ణోత్సవం జరుపుకున్న విషయం తెల్సిందే. ఆ విషయమై బాలకృష్ణ సంతోషం వ్యక్తం చేశారు. తాను స్వర్ణోత్సవం జరుపుకున్న ఏడాదిలోనే నాన్నగారి వజ్రోత్సవం జరగడం చాలా సంతోషాన్ని ఇచ్చింది. ఇదో గొప్ప అనుభవం. ఆయన వారసుడిగా పుట్టినందుకు గర్విస్తున్నా. నాన్న నుంచి నన్ను, నా కుటుంబ సభ్యులను ఆధరిస్తూ మా అందరికి ప్రోత్సాహం అందించిన ప్రేక్షకులకు కృతజ్ఞతలు అన్నారు.

ఈ సుదీర్ఘ ప్రయాణంలో సహకరించిన ప్రేక్షకులతో పాటు ప్రతి ఒక్కరికి కృతజ్ఞతలు తెలియజేసిన బాలకృష్ణ సోషల్‌ మీడియా ద్వారా తన సంతోషంను పంచుకున్నారు. సినిమాల్లో సీనియర్‌ ఎన్టీఆర్‌ మొదటి నుంచి ప్రత్యేకమైన పాత్రలు, ప్రత్యేకమైన సినిమాలు చేయడం ద్వారా అంందరి దృష్టిని ఆకర్షించారు. తెలుగువారు గర్వించే విధంగా ఏకంగా ముఖ్యమంత్రి అయ్యారు. ప్రతి రోజు ఎన్టీఆర్‌ ను గురించి ఏదో ఒక చోట తెలుగు సినిమా ప్రముఖులు గుర్తు చేసుకుంటూనే ఉంటారు. బాలకృష్ణ సైతం తెలుగు సినిమా ఇండస్ట్రీకి అశేష కృషి చేయడం జరిగింది. నందమూరి ఫ్యామిలీ చేసిన సినిమాలు తెలుగు సినిమా చరిత్రలో నిలిచి పోయినవి చాలానే ఉన్నాయి.

ప్రస్తుతం బాలకృష్ణ చేస్తున్న సినిమాల విషయానికి వస్తే... బాబీ దర్శకత్వంలో డాకు మహారాజ్ సినిమాను చేయడం జరిగింది. ఆ సినిమా సంక్రాంతికి ప్రేక్షకుల ముందుకు రాబోతుంది. బాక్సాఫీస్ వద్ద ఆ సినిమా భారీ వసూళ్లు సొంతం చేసుకోవడం ఖాయం అంటూ ఫ్యాన్స్‌ తో పాటు ప్రతి ఒక్కరు నమ్మకం వ్యక్తం చేస్తున్నారు. మరో వైపు అఖండ 2 సినిమాలోనూ నటిస్తున్నాడు. బోయపాటి శ్రీను దర్శకత్వంలో రూపొందుతున్న అఖండ 2 సినిమా బాక్సాఫీస్‌ వద్ద సందడి చేయడం కోసం ఫ్యాన్స్ ఆసక్తిగా ఎదురు చూస్తున్నారు. 2025లోనే సినిమా ప్రేక్షకుల ముందుకు వచ్చే అవకాశాలు ఉన్నాయి.