క్లైమాక్స్.. కేకో కే'క'.. కిరణ్ చెప్పింది 100% కరెక్ట్!

టాలీవుడ్ యంగ్ హీరో కిరణ్ అబ్బవరం నటించిన లేటెస్ట్ మూవీ ''క''. సుజిత్‌ & సందీప్‌ దర్శకత్వంలో తెరకెక్కిన ఈ సినిమా.. దీపావళి కానుకగా గురువారం ప్రేక్షకుల ముందుకు వచ్చింది. ఎన్నో అంచనాల మధ్య థియేటర్లో విడుదలైన ఈ చిత్రానికి ప్రీమియర్స్ నుంచే పాజిటివ్ టాక్ వచ్చింది. సరికొత్త కాన్సెప్ట్ తో వచ్చిన ఈ చిత్రం ఆడియన్స్ ను బాగా ఆకట్టుకుంటోంది. మొదటి రోజు కంటే రెండో రోజు అడ్వాన్స్ బుకింగ్స్ ఎక్కువగా ఉండటం చూస్తుంటే, బాక్సాఫీస్ వద్ద బ్లాక్ బస్టర్ గ్యారంటీ అనిపిస్తోంది. ఈ నేపథ్యంలో కిరణ్ అబ్బవరం చెప్పి మరీ హిట్టు కొట్టాడని నెటిజన్లు కామెంట్లు చేస్తున్నారు.

'క' లాంటి కాన్సెప్ట్‌తో ఇంతకముందు ఏ సినిమా రాలేదని.. ఒకవేళ ఈ సినిమాలోని పాయింట్ ఎక్కడైనా టచ్ అయిందని అనిపిస్తే సినిమాలు తీయడం మానేస్తానని.. క్లైమాక్స్ సర్ప్రైజ్ చేస్తుందని ప్రమోషన్స్ లో హీరో కిరణ్ అబ్బవరం చెబుతూ వచ్చారు. బిగ్ స్క్రీన్ మీద ఈ సినిమా చూశాక, కిరణ్ చెప్పిన మాటల్లో ఏమాత్రం అతిశయోక్తి లేదనిపిస్తుంది. దర్శక ద్వయం ఎంచుకున్న కథ, దాన్ని నడిపించిన తీరు, కథలోనే కాన్ఫ్లిక్ట్, హీరోకి ఎదురయ్యే సవాళ్లు.. ఇవన్నీ ప్రేక్షకులను ఆకట్టుకుంటున్నాయి.

"క" చిత్రంలో కిరణ్ అబ్బవరం యాక్టింగ్, మూవీ మేకింగ్, బ్యాక్ గ్రౌండ్ మ్యూజిక్, కెమెరా వర్క్, వీఎఫ్ఎక్స్.. ఇలా ప్రతి అంశాన్ని జనాలు మెచ్చుకుంటున్నారు. సినిమా అంతా ఒకెత్తైతే.. ఇంటర్వెల్ సీక్వెన్స్, క్లైమాక్స్ సీన్స్ మరొకెత్తు అని చెప్పాలి. ఈ రెండు బ్లాక్స్ సినిమాలో మైండ్ బ్లోయింగ్ అనేలా ఉన్నాయి. మరీ ముఖ్యంగా పతాక సన్నివేశాలు ఎంతో థ్రిల్లింగ్ కు గురి చేస్తాయి. దర్శకులు కథను ముగించిన తీరు కచ్ఛితంగా ప్రేక్షకులకు ఓ కొత్త అనుభూతిని అందిస్తుంది. ఇదే సినిమాకి హైలైట్ గా నిలిచింది.

కిరణ్ చెప్పినట్లు ఇలాంటి కాన్సెప్ట్ ఇండియన్ స్క్రీన్ మీద ఇంతవరకూ రాలేదు. క్లైమాక్స్ అయితే నెక్స్ట్ లెవల్ లో ఉంది. హలీవుడ్ మూవీ 'ఇంటర్ స్టెల్లర్' క్లైమాక్స్ ఎంత గ్రిప్పింగ్ గా ఎంత ఇంట్రెస్టింగ్ గా అనిపిస్తుందో.. ఇంచుమించు 'క' క్లైమాక్స్ కూడా అలానే ఎంతో థ్రిల్లింగ్ గా అనిపిస్తుంది, ఆడియన్ కు అంతే కిక్ ఇస్తుంది. చివర్లో వచ్చే ట్విస్ట్ షాక్ కు గురి చేస్తుంది. ట్విస్ట్ రివీల్ అవుతుంది కాబట్టి, అదేంటనేది ఇక్కడ చెప్పడం లేదు. కొత్తగా సినిమా చూసేవాళ్ళు కూడా ఆ థ్రిల్ ను ఎక్స్ పీరియన్స్ చెయ్యాలి కదా!

కిరణ్‌ అబ్బవరం తన స్వీయ నిర్మాణంలో నటించిన తొలి పాన్‌ ఇండియా మూవీ 'క'. అతని కెరీర్ లోనే భారీ బడ్జెట్‌తో రూపొందింది. తెలుగుతో పాటుగా అన్ని భాషల్లో రిలీజ్ చేయాలనుకున్నారు. కాకపోతే థియేటర్లు దొరక్క పోవడంతో విడుదల చేయలేదు. కానీ ఇప్పుడు తెలుగులో సూపర్ రెస్పాన్స్ వస్తోంది కాబట్టి, త్వరలోనే ఇతర భాషల్లో విడుదల చేసే అవకాశం ఉంది.