ర‌ష్మిక‌ను KRK ఎంత మాట‌న్నాడు?

బాలీవుడ్ లో వివాదాస్ప‌ద క్రిటిక్ గా పాపుల‌రైన కేఆర్కే స్టార్ల‌ను విమ‌ర్శిస్తూ వారికి శ‌త్రువుగా మారిన సంగ‌తి తెలిసిందే. తాను ఏం చెప్ప‌ద‌లిస్తే దానిని ముక్కు సూటిగా చెప్పేందుకు అత‌డు వెన‌కాడ‌డు. స‌మీక్ష‌ల పేరుతో స్టార్ల నట‌న‌పై తీవ్రంగా దుమ్మెత్తిపోస్తాడు. ఇంత‌కుముందు ప్ర‌భాస్, విజ‌య్ దేవ‌ర‌కొండ, స‌ల్మాన్ ఖాన్ స‌హా చాలామందికి స‌రిగా న‌ట‌న రాద‌ని కూడా విమ‌ర్శించాడు.

ఇప్పుడు ఈ జాబితాలో ర‌ష్మిక మంద‌న్న కూడా చేరింది. "రష్మిక మందన్నకు యాక్టింగ్ తెలియదు" అని KRK విమ‌ర్శించాడు. యానిమ‌ల్ లో పేల‌వంగా న‌టించింద‌ని అన్నాడు. ర‌ణ‌బీర్ క‌పూర్ క‌థానాయ‌కుడిగా, సందీప్ రెడ్డి వంగా తెర‌కెక్కించిన 'యానిమల్' 2023లో మోస్ట్ అవైటెడ్ చిత్రాలలో ఒకటి. మేకర్స్ 23 నవంబర్ 2023న ఈ మూవీ ట్రైలర్‌ను ఆవిష్కరించినప్పటి నుండి చర్చనీయాంశంగా మారింది. ఇది ర‌ణబీర్ అభిమానుల‌ను ఉన్మాదానికి గురిచేసింది. అయితే ట్రైలర్ విడుద‌ల‌య్యాక ఇందులో రష్మిక మందన్న నటన కొంద‌రిని ఆకట్టుకోలేదు. ప్రేక్షకుల నుండి మిశ్రమ స్పందన వ్య‌క్త‌మైంది. ఇప్పుడు స్వయం ప్రకటిత విమర్శకుడు KRK కూడా ర‌ష్మిక‌ను తీవ్రంగా విమ‌ర్శించాడు.

రణబీర్‌తో పాటు, పవర్‌హౌస్ పెర్ఫార్మర్స్ అనిల్ కపూర్ - బాబీ డియోల్ కూడా ఈ క్రేజీ చిత్రంలో న‌టిస్తున్న సంగ‌తి తెలిసిందే. అనిల్ - బాబీ తమ ప్రభావవంతమైన నటనకు ప్రశంసలు అందుకోగా, ట్రైలర్‌లో రష్మిక పాత్ర ప్రేక్షకుల నుండి మిశ్రమ స్పందనను అందుకుంది. చాలా మంది సోషల్ మీడియా ప్లాట్‌ఫారమ్‌లలో తమ అభిప్రాయాలను వ్యక్తం చేయడంతో రష్మిక విమర్శలకు కేంద్రంగా మారింది. కొంద‌రు ర‌ష్మిక‌ను అతిగా నటించిందంటూ విమ‌ర్శించారు.

KRK స్వ‌యంగా సోష‌ల్ మీడియాలో క్లిప్‌ను షేర్ చేసి విమ‌ర్శిస్తూ.. "ర‌ష్మిక‌ నటనను కత్రినా కైఫ్, జాక్వెలిన్ ఫెర్నాండెజ్, నర్గీస్ ఫక్రీ వంటి ఇతర నటీమణులతో పోల్చారు. వీరంతా మంచి నటనా నైపుణ్యం లేని క‌థానాయిక‌లు అంటూ గ‌తంలో విమర్శలను ఎదుర్కొన్నారు. ర‌ష్మిక‌కు న‌ట‌న‌ రాదనే దానికి ఇది నిదర్శనం" అని కేఆర్కే ట్వీట్ చేశారు.

అయితే ప‌రిశ్ర‌మ అగ్ర క‌థానాయిక‌ల‌తో పాటు అగ్ర హీరోల‌ను కేఆర్కే విమ‌ర్శించారు. ఏదో ఒక చిన్న బిట్ వీడియోని వీక్షించి విమ‌ర్శిస్తే అది ప్రామాణికం కాదు. పెద్ద తెర‌పై పుష్ప‌లో శ్రీ‌వ‌ల్లిగా ర‌ష్మిక ఎంత‌టి మ్యాజిక్ చేసిందో చూశాం. ఇప్పుడు యానిమ‌ల్ లోను న‌ట‌న‌కు ఆస్కారం ఉన్న పాత్ర‌లో అవ‌కాశం ద‌క్కించుకుంద‌ని కూడా అర్థ‌మ‌వుతోంది. పూర్తి సినిమా చూశాక ఎవ‌రేమ‌ని అంటారో చూడాలి.