టాలీవుడ్ కు సాయి మస్తాన్ భయం.. ఎవరు ఇతను? బ్యాక్ గ్రౌండ్ ఏంటి?

గుంటూరుకు చెందిన రావి సాయి మస్తాన్ అనే యువకుడ్ని విజయవాడ పోలీసులు అరెస్టు చేశారు. అది కూడా అక్రమ పద్దతిలో డ్రగ్స్ తెస్తున్న ఉదంతంలో. ఇంతవరకు బాగానే ఉంది. కానీ.. ఇక్కడే ఒక పెద్ద లెక్క తెర మీదకు వచ్చి పడింది. ఎప్పుడైతే రావి సాయి మస్తాన్ ను విజయవాడ సెబ్ పోలీసులు అరెస్టు చేశారో.. టాలీవుడ్ లోని కొందరు ఉలిక్కిపడిన పరిస్థితి. అంతేకాదు.. లావణ్యకు డ్రగ్స్ ఇచ్చింది కూడా ఇతనే అన్న ఆరోపణ ఉంది. అంతేకాదు.. లావణ్య సైతం రాజ్ తరుణ్ మీద ఆరోపణలు చేసిన సమయంలో సాయి మస్తాన్ పేరును పలుసార్లు ప్రస్తావించింది.

రెండు నెలల క్రితం ట్రైన్లో డ్రగ్స్ తీసుకొస్తూ విజయవాడ సెబ్ పోలీసులకు చిక్కిని వ్యక్తిని అరెస్టు చేయటం.. ఇతను ఇచ్చిన సమాచారంతోనే రావి మస్తాన్ సాయి పేరు తెర మీదకు వచ్చింది. గుంటూరుకు చెందిన యనమల గోపీచంద్ ఢిల్లీ నుంచి 35 గ్రాముల ఎండీఎంఏ డ్రగ్ ను కొనుగోలు చేసి విజయవాడకు ట్రైన్ లో వస్తుండగా జూన్ మూడున అతన్ని అదుపులోకి తీసుకున్నారు. విచారణలో మస్తాన్ సాయి పేరును చెప్పటం.. అతనికి వల వేసి.. రెండు నెలలుగా కాపు కాసిన నేపథ్యంలో తాజాగా అతను అరెస్టు అయ్యారు.

అతన్ని ప్రాథమికంగా విచారించిన పోలీసులకు అతనికి.. టాలీవుడ్ లోని పలువురితో సన్నిహిత సంబంధాలు ఉన్నట్లుగా చెబుతున్నారు. టాలీవుడ్ కు ఇప్పటికే అంటుకున్న డ్రగ్స్ మరకలో మస్తాన్ సాయి హస్తం ఉందన్న మాట వినిపిస్తోంది. ఇతగాడు నోరు విప్పితే.. పలువురు ప్రముఖులకు తలనొప్పులు ఖాయమంటున్నారు. అందుకే.. ఇతగాడి అరెస్టు మాట విన్నంతనే తెలుగుచిత్రపరిశ్రమలోని పలువురికి కొత్త టెన్షన్ మొదలైంది.

ఇంతకూ ఈ మస్తాన్ సాయి ఎవరు? అతడి బ్యాక్ గ్రౌండ్ ఏంటి? అన్న వివరాల్లోకి వెళితే.. సాయి తండ్రి రామ్మోహన్ రావు.. మస్తాన్ దర్గా ధర్మకర్తగా వ్యవహరిస్తున్నారు. ఆయన కుమారుడే సాయి మస్తాన్ రావు. బీటెక్ పూర్తి చేసిన ఇతను హైదరాబాద్ లో ఐటీ ఉద్యోగిగా ఒక కంపెనీలో పని చేస్తున్నాడు. ఇతనికి సినీ.. రాజకీయ కుటుంబాలతో సంబంధాలు ఉన్నట్లుగా చెబుతున్నారు. వైసీపీ మాజీ ఎమ్మెల్యే కొడుకు.. వైసీపీ మాజీ ఎమ్మెల్యే సోదరుని కుమారుడుతోనూ సంబంధాలు ఉన్నట్లు చెబుతున్నారు. ఈ క్రమంలోనే సినీ పరిశ్రమతో పరిచయాలు పెంచుకున్నట్లు చెబుతున్నారు .