పుష్ప 2: భారం తీర్చుకుంటున్న సుక్కు..!

ఇండియాలోనే మోస్ట్ ప్రెస్టీజియస్ మూవీగా వస్తోన్న ‘పుష్ప 2’ పైన అందరి ఫోకస్ ఉంది. ఈ సినిమాపై మేకర్స్, డిస్టిబ్యూటర్స్, ఎగ్జిబిటర్లు చాలా హోప్స్ పెట్టుకున్నారు. కచ్చితంగా సినిమా భారీ లాభాలు తెచ్చిపెడుతుందని ఆశపడుతున్నారు. సినిమా నుంచి ఇప్పటి వరకు వచ్సిన సాంగ్స్, ట్రైలర్ కి అద్భుతమైన రెస్పాన్స్ వచ్చింది. దీంతో పబ్లిక్ అటెన్షన్ కూడా ఈ సినిమాపై ఎక్కువగానే ఉందని అర్ధమవుతోంది. ఈ నేపథ్యంలో ‘పుష్ప 2’ చాలా రికార్డ్స్ ని బ్రేక్ చేస్తుందని ట్రేడ్ పండితులు కూడా అంచనా వేస్తున్నారు.

ఈ సినిమా ప్రమోషన్స్ కూడా అగ్రెసివ్ గా జరుగుతున్నాయి. కానీ అందరిని టెన్షన్ పెట్టే ఒకే ఒక్క అంశం సుకుమార్ ఈ సినిమా షూటింగ్, పోస్ట్ ప్రొడక్షన్ వర్క్ ఇంకా కంప్లీట్ చేయకపోవడమే. భారీ అంచనాల మధ్య రిలీజ్ అవుతోన్న ఇలాంటి పాన్ ఇండియా సినిమాల ఫస్ట్ కాపీ వీలైనంత వేగంగా రెడీ చేసుకొని ప్రమోషన్స్ పై ఫోకస్ చేయాలి. అయితే సుకుమార్ ఈ విషయంలో కొంత వెనుకబడి ఉన్నారనేది చాలా మంది చెప్పే మాట.

మూవీ రిలీజ్ కి ఇంకా 12 రోజుల సమయం మాత్రమే ఉంది. అయిన ఇంకా షూటింగ్ పూర్తి కాలేదనే మాట వినిపిస్తోంది. అయితే ఎట్టకేలకు ఈ మూవీ షూటింగ్ ఫినిష్ అవ్వబోతోందని తెలుస్తోంది. ఓ వైపు సుకుమార్ పోస్ట్ ప్రొడక్షన్ వర్క్ చూసుకుంటూనే సినిమాకి ఫినిషింగ్ టచ్ ఇచ్చే పనిలో ఉన్నారు. ఐటెం సాంగ్ కూడా పూర్తి చేసే పనిలో ఉన్నారు. అయితే ఈ సాంగ్ షూటింగ్ పర్యవేక్షణ అంతా కూడా కొరియోగ్రాఫర్ సారధ్యంలోనే జరిగిందంట.

సుకుమార్ పోస్ట్ ప్రొడక్షన్ పైన పూర్తిగా దృష్టి పెట్టాడంట. సుకుమార్ లేకుండా సహాయ దర్శకులు కొన్ని షాట్స్ ని పూర్తి చేశారని సమాచారం. ఒకేసారి మూడు యూనిట్స్ తో ఈ సినిమా ఫైనల్ షూటింగ్ కోసం డే అండ్ నైట్ పనిచేశారని ఇండస్ట్రీ వర్గాలలో వినిపిస్తోంది. ఎట్టకేలకి మూవీకి గుమ్మడికాయ కొట్టబోతున్నారని తెలుస్తోంది. ఆదివారంతోనే షూటింగ్ కి ప్యాకప్ చెప్పేశారు. ఇకపై సుకుమార్ పూర్తిస్థాయిలో పోస్ట్ ప్రొడక్షన్ పైన దృష్టి పెట్టబోతున్నాడని సమాచారం.

ఈ నెల ఆఖరుకి ఫస్ట్ కాపీ సిద్ధం చేయాలనే లక్ష్యంతో సుకుమార్ ఉన్నారంట. అందుకే ఎక్కువ రెస్ట్ తీసుకోకుండా టీమ్ మొత్తాన్ని కష్టపెడుతున్నట్లు ప్రచారం జరుగుతోంది. ఎంత కష్టపడిన అనుకున్న స్థాయిలో రిజల్ట్ వస్తే ఆ శ్రమని పూర్తిగా మరిచిపోతారు. మరి సుకుమార్ కష్టానికి తగ్గట్లుగా ఈ సినిమా ఫలితం ఇస్తుందా లేదా అనేది వేచి చూడాలి.