చర్మం ఒలిచి, ముక్కలుగా నరికి... బంగ్లా ఎంపీ హత్యలో సూత్రధారి, పాత్రధారి వీళ్లే!

వైద్యచికిత్స కోసం పశ్చిమ బెంగాల్‌ లోని స్నేహితుడి ఇంటికి వచ్చిన బంగ్లాదేశ్ అధికార పార్టీ ఎంపీ మహమ్మద్‌ అన్వర్‌ ఉల్‌ అనర్‌ హత్యకు గురైన సంగతి తెలిసిందే. దీంతో ఈ కేసు రెండు దేశాల్లోనూ హాట్ టాపిక్ గా మారింది. ఈ క్రమంలో తాజాగా ఈ కేసుకు సంబంధించి మరిన్ని దారుణాలు వెలుగులోకి వస్తున్నాయి.

అవును... కోల్ కతా లో హత్యకు గురైన బంగ్లాదేశ్ ఎంపీ మహమ్మద్ అన్వర్ ఉల్ అనర్ కేసులో హనీ ట్రాప్ ఇష్యూ తెరపైకి వచ్చీంది. ఇందులో భాగంగా... ఓ మహిళతో ఆయనను వలపు వలలోకి లాగి హత్య చేసినట్లు అనుమానాలు వ్యక్తమవుతున్నాయి. ఈ కేసులో బంగ్లాదేశ్ నుంచి వచ్చిన ఓ అక్రమ వలసదారుడిని కోల్‌ కతా పోలీసులు అరెస్టు చేశారని తెలుస్తుంది.

పైగా ఆ హత్య అనంతరం మృతదేహాన్ని అదృశ్యం చేసేందుకు నిందితులు దారుణంగా ప్రవర్తించారని తెలుస్తోంది. ఇందులో భాగంగా అతని చర్మాన్ని ఒలిచి.. శరీరాన్ని ముక్కలుగా నరికినట్లు పోలీసులు అనుమానిస్తున్నారు. ఈ క్రమంలో తాజాగా బెంగాల్‌ సీఐడీ అధికారులు స్పందిస్తూ కీలక విషయాలు వెల్లడించారు.

ఇందులో భాగంగా... అమెరికాలో నివసించే ఓ మిత్రుడు అద్దెకు తీసుకున్న టౌన్‌ హాల్‌ ప్రాంతంలోని అపార్ట్‌మెంట్‌ లోకి ఇద్దరు పురుషులు, ఒక మహిళతో కలిసి వెళ్లిన బంగ్లా ఎంపీ.. ఆ తర్వాత తిరిగిరాలేదని గుర్తించినట్లు చెబుతున్నారు. ఈ నేపథ్యంలోనే ఎంపీని ఓ మహిళతో హనీట్రాప్‌ చేయించి ఆ అపార్ట్‌మెంట్‌ కి రప్పించి ఉంటారని అంటున్నారు.

పైగా.. మృతుడి స్నేహితుడికి ఆ మహిళ సన్నిహితురాలేనని.. ఫ్లాట్‌ లోకి వెళ్లగానే ఆయనను హత్య చేసి ఉంటారని పోలీసులు అనుమానిస్తున్నారట. అయితే ఇప్పటివరకూ ఉన్న ప్రాథమిక ఆధారాలను పరిశీలిస్తే.. ఎంపీని గొంతునులిమి చంపినట్లు తెలుస్తోందని.. ఆ తర్వాత ఎవరూ గుర్తుపట్టకుండా ఉండటం కోసమే ఆయన మృతదేహాన్ని ముక్కలుగా నరికి ఉంటారని పోలీసులు భావిస్తున్నారట.

ఇలా ముక్కలుగా నరికిన శరీర భాగాలు దుర్మాసన రాకుండా ఉండేందుకు వాటికి పసుపు కలిపి పెట్టినట్లుగా అనిపిస్తోందని.. ఈ క్రమంలో కొన్ని భాగాలను ఫ్రిజ్‌ లో పెట్టినట్లు ప్రాథమికంగా నిర్ధరించామని పోలీసులు వెల్లడిస్తున్నారని అంటున్నారు. అనంతరం ఎంపీ శరీర భాగాలను ప్లాస్టిక్‌ బ్యాగుల్లో తీసుకుని వివిధ ప్రదేశాల్లో పడేసి ఉంటారని పోలీసులు తెలిపారు.

కీలక నిందితుడు అరెస్ట్!:

ఈ కేసుకు సంబంధించి ఒక కీలక నిందితుడిని అరెస్ట్ చేసినట్లు పోలీసులు చెబుతున్నారు. ఇందులో భాగంగా బంగ్లాదేశ్‌ నుంచి అక్రమంగా భారత్‌ లోకి వచ్చిన జిహాద్‌ హవల్దార్‌ ఈ ఘటనలో కీలక పాత్ర పోషించాడని పోలీసులు చెబుతున్నారు. ఎంపీని హత్య చేసి ఆయన మృతదేహాన్ని ఛిద్రం చేసినట్లు నిందితుడు హవల్దార్‌ అంగీకరించాడని పోలీసులు చెబుతున్నారు.

ఇక సూత్రధారి విషయానికొస్తే... ఈ ఘటన వెనుక ప్రధాన సూత్రధారి బంగ్లాదేశ్‌ సంతతికి చెందిన అమెరికా పౌరుడు, ఎంపీ పాత స్నేహితుడు అఖ్తరుజమాన్‌ అని.. పాత్రధారి జిహాద్‌ హవల్దార్‌ బయటపెట్టాడని అంటున్నారు. అతడి ఆదేశాలతోనే తాను ఈ పనిచేసినట్లు విచారణలో హవల్దార్‌ చెప్పాడని చెబుతున్నారు.