గ్రోక్ అదుర్స్: ఫోటో ఎడిటింగ్ ఫీచర్‌తో పాటు హిందీ రచ్చపై మస్క్ క్లారిటీ!
ఇదివరకే సూటిగా, సుత్తి లేకుండా సమాధానాలిస్తూ నెటిజన్ల దృష్టిని ఆకర్షించిన గ్రోక్, ఇప్పుడు ఫోటో ఎడిటింగ్ ఫీచర్‌తో మరింత క్రేజ్ సంపాదించుకునేలా ఉంది.;
ట్విట్టర్‌లో సంచలనం సృష్టిస్తున్న ఏఐ చాట్‌బాట్ 'గ్రోక్' మరో అద్భుతమైన ఫీచర్‌తో యూజర్లను అలరించేందుకు సిద్ధమైంది. తాజాగా ఈ చాట్‌బాట్‌లో ఫోటో ఎడిటింగ్ ఫీచర్‌ను అందుబాటులోకి తీసుకువచ్చారు. యూజర్లు కేవలం టైప్ చేస్తే చాలు, గ్రోక్ ఆ ఫోటోను అద్భుతంగా ఎడిట్ చేసి చూపిస్తుంది. మార్ఫింగ్ చేసినా గుర్తుపట్టలేనంత సహజంగా ఈ ఎడిటింగ్ ఉంటుందని స్వయంగా ఎలాన్ మస్క్ ఒక వీడియోను షేర్ చేశారు. ఇదివరకే సూటిగా, సుత్తి లేకుండా సమాధానాలిస్తూ నెటిజన్ల దృష్టిని ఆకర్షించిన గ్రోక్, ఇప్పుడు ఫోటో ఎడిటింగ్ ఫీచర్‌తో మరింత క్రేజ్ సంపాదించుకునేలా ఉంది.
మరోవైపు, గ్రోక్ ఇటీవల భారత్‌లో హిందీ తిట్ల వివాదంతో వార్తల్లో నిలిచింది. కొంతమంది యూజర్లు అడిగిన ప్రశ్నలకు గ్రోక్ హిందీలో అభ్యంతరకర వ్యాఖ్యలు చేసిందని ఆరోపించారు. అయితే గ్రోక్ సినిమాలు, రాజకీయాలు, క్రీడలపై చాలా నిజాయితీగా సమాధానాలు ఇస్తోందని కొందరు నెటిజన్లు సమర్థిస్తున్నారు. ఈ వివాదంపై ఒక అంతర్జాతీయ మీడియా కథనం ప్రచురించగా ఎలాన్ మస్క్ నవ్వుతున్న ఎమోజీతో స్పందించారు. మస్క్ రిప్లై వైరల్ కావడంతో నెటిజన్లు భిన్న రకాలుగా స్పందిస్తున్నారు. ఒక నెటిజన్ మస్క్ పోస్ట్‌కు అర్థం ఏమిటని గ్రోక్‌ను ప్రశ్నించగా "భారత్‌లో నెలకొన్న ఈ రాజకీయ వివాదం నవ్వు తెప్పించేదిగా ఉందని ఆయన భావిస్తున్నట్లు" గ్రోక్ సమాధానమిచ్చింది.
ఎలాన్ మస్క్‌కు చెందిన ఎక్స్‌ఏఐ సంస్థ ఈ గ్రోక్ చాట్‌బాట్‌ను అభివృద్ధి చేసింది. ఇది భూమిపై అత్యంత తెలివైన ఏఐ సాధనమని మస్క్ అభివర్ణించారు. గ్రోక్ హిందీ భాషను కూడా ఉపయోగించగలదు. అయితే, కొన్ని అభ్యంతరకర పదాలు ఉండటం వివాదానికి దారితీసింది. ఈ విషయంపై కేంద్ర ప్రభుత్వం దృష్టి సారించింది. గ్రోక్ వివాదంపై ఎక్స్ ప్రతినిధులతో కేంద్ర సమాచార, సాంకేతిక మంత్రిత్వ శాఖ అధికారులు సంప్రదింపులు జరుపుతున్నట్లు సమాచారం.
ఇదిలా ఉండగా, ప్రముఖ బాలీవుడ్ దర్శకుడు వివేక్ అగ్నిహోత్రి పేరును గ్రోక్ సోషల్ మీడియాలో తప్పుడు వార్తలు సృష్టించే వ్యక్తుల జాబితాలో చేర్చింది. దీనిపై దర్శకుడు ఆగ్రహం వ్యక్తం చేయడంతో గ్రోక్ ఆయనకు క్షమాపణలు చెప్పింది. ఇకపై ఇలాంటి తప్పులు జరగకుండా చూసుకుంటామని, వాస్తవాల ఆధారంగానే సమాధానాలు అందిస్తామని హామీ ఇచ్చింది.
మొత్తానికి గ్రోక్ తన కొత్త ఫోటో ఎడిటింగ్ ఫీచర్‌తో యూజర్లను ఆకట్టుకుంటుండగా, హిందీ తిట్ల వివాదం మాత్రం ఇంకా చర్చనీయాంశంగానే ఉంది. ఈ వివాదంపై ప్రభుత్వం చర్యలు తీసుకుంటుండటంతో, రానున్న రోజుల్లో గ్రోక్ ఎలాంటి మార్పులు చేసుకుంటుందో చూడాలి.