అపర కుబేరుడు.. మళ్లీ పెళ్లి కొడుకాయెనె.. మస్క్ కు సరిజోడు

ఎలాస్ మస్క్.. ప్రపంచ కుబేరుడు.. ఇటీవలి అమెరికా ఎన్నికల్లో రిపబ్లికన్ అభ్యర్థి డొనాల్డ్ ట్రంప్ నకు మద్దతు పలికి రోజుల వ్యవధిలోనే రూ.2 లక్షల కోట్ల వరకు సంపాదించాడు. అలాంటి మస్క్.. వ్యక్తిగత జీవితం గురించి అందరికీ తెలిసిందే. మస్క్ మూడు వివాహాలు చేసుకున్నాడు. ఇక ప్రపంచవ్యాప్తంగా మస్క్ తర్వాత అత్యంత పాపులర్ అయిన అపర కుబేరుడు జెఫ్ జెబోస్. ఇలా చెప్పే కంటే మన ఇంటింటికీ వచ్చే అమెజాన్ అధిపతి జెఫ్ బెజోస్ అంటే అందరికీ తెలిసిపోతుంది. ఇపుడు బెజోస్ మళ్లీ వార్తల్లోకి వచ్చారు.

మళ్లీ పెళ్లి..

మస్క్ తర్వాత ప్రపంచ రెండో సంపన్నుడు అమెజాన్‌ వ్యవస్థాపకుడు జెఫ్‌ బెజోస్‌. అయితే, 2019లోనే బెజోస్‌ తన భార్య మెకంజీ స్కాట్‌ తో విడిపోయారు. వీరికి 1994లోనే వివాహమైంది. 25 ఏళ్ల బంధానికి స్వస్తి పలికారు. అయితే, బెజోస్- మెకంజీలకు నలుగురు పిల్లలు. కాగా, ఐదేళ్ల తర్వాత బెజోస్ మళ్లీ వివాహ బంధంలోకి అడుగుపెట్టబోతున్నారు. తన ప్రియురాలు లారెన్‌ శాంచెజ్‌ ను ఆయన పెళ్లి చేసుకోనున్నారు. వచ్చే క్రిస్మస్‌ రోజునే వీరి పెళ్లి. అయితే, వీరిద్దరికీ 2019కి ముందే బంధం ఏర్పడినా.. స్కాట్ తో విడాకుల ప్రక్రియ పూర్తయ్యే వరకు బయటకు వెల్లడించలేదు. లారెన్‌ కు కూడా ఇది రెండో వివాహమే. గతంలో పాట్రిక్‌ వైట్‌ సెల్‌ తో ఆమెకు పెళ్లయింది. వీరికి ఇద్దరు పిల్లలు పుట్టారు. మాజీ ఎన్‌ఎఫ్‌ఎల్‌ ఆటగాడు టోనీ గోంజలెజ్‌ తోనూ లారెన్ ఓ కుమారుడికి జన్మనివ్వడం గమనార్హం.

అమెరికాలోని కొలరాడోలో ఉన్న ఆస్పెన్‌ లో అతి కొద్దిమంది సన్నిహితులు, కుటుంబ సభ్యుల సమక్షంలో బెజోస్-లారెన్ వివాహం చేసుకోనున్నారు. అయితే, మేలోనే వీరి నిశ్చితార్థం జరిగిందట. అది కూడా ఫ్రాన్స్‌ లో సెలవులు గడిపేందుకు వెళ్లిన సమయంలోనట. విలాసవంతమైన నౌకలో 2.5 మిలియన్‌ డాలర్ల (దాదాపు రూ.21కోట్లు) గులాబీ రంగు వజ్రాల ఉంగరం ఇచ్చి బెజోస్‌.. తన ప్రేయసికి ప్రపోజ్‌ చేశారట.

54 ఏళ్ల లారెన్ ఒకప్పుడు జర్నలిస్టు. చారిటీ కార్యక్రమాల్లో చురుగ్గా పాల్గొంటారు. బెజోస్‌ తో 2018 నుంచే డేటింగ్‌లో ఉన్నారు. బెజోస్ 2019 వరకు తన భార్యతో ఉండడంతో ఈ విషయం బయటకు రాలేదు.