షాకింగ్: కాంబ్లీ భార్య విడాకుల ప్లాన్స్‌!
ఇటీవలి ఇంటర్వ్యూలో ఆండ్రియా మాట్లాడుతూ.. కాంబ్లీ మద్యపాన వ్యసనం త‌మ బాంధ‌వ్యంలో చిచ్చు పెట్టింద‌ని అన్నారు.
క్రికెట్ గాడ్ స‌చిన్ టెండూల్క‌ర్ స‌మ‌కాలికుడు, టీమిండియా మాజీ బ్యాట్స్‌మన్ వినోద్ కాంబ్లీ ప‌రిచ‌యం అవ‌స‌రం లేదు. అత‌డి వృత్తిగ‌త, వ్య‌క్తిగ‌త జీవితం ఆశించిన విధంగా సాగ‌లేదు. వ్య‌క్తిగ‌తంగా చూస్తే, మొద‌టి భార్య‌కు విడాకులిచ్చిన కాంబ్లీ రెండో పెళ్లి చేసుకున్నారు. అయితే తాజాగా ఓ ఇంట‌రాక్ష‌న్ లో రెండో భార్య ఆండ్రియా హెవిట్ ఒక షాకింగ్ విష‌యం చెప్పింది.
భ‌ర్త అల‌వాట్ల‌తో స‌రిప‌డ‌క 2023లో విడాకులకు దరఖాస్తు చేసుకున్నానని, కానీ అత‌డి నిస్సహాయ స్థితి చూసాక నిర్ణ‌యాన్ని వెన‌క్కి తీసుకున్నాన‌ని వెల్లడించింది. ఇటీవలి ఇంటర్వ్యూలో ఆండ్రియా మాట్లాడుతూ.. కాంబ్లీ మద్యపాన వ్యసనం త‌మ బాంధ‌వ్యంలో చిచ్చు పెట్టింద‌ని అన్నారు. ఆండ్రియా- కాంబ్లీ జంట 2006లో సివిల్ కోర్టులో జరిగిన ఒక ప్రైవేట్ వేడుకలో వివాహం చేసుకున్నారు. అయితే ఆండ్రియా అత‌డి తాగుడు అల‌వాటు గురించి క‌ల‌త చెందాన‌ని తెలిపారు. ఇటీవల లేటు వ‌య‌సులో కాంబ్లీ ఆరోగ్య పరిస్థితి చాలా మంది అభిమానులను ఆందోళనకు గురిచేసింది. అతడు డిసెంబర్ 21న మూత్ర సంబంధిత స‌మ‌స్య‌ల‌ను ఎదుర్కొని ఆస్ప‌త్రిలో చేరారు.
ఫ్రీలాన్స్ జర్నలిస్ట్ సూర్యాన్షి పాండేతో పాడ్‌కాస్ట్ లో కాంబ్లీ రెండో భార్య త‌న క‌ఠిన నిర్ణ‌యం గురించి బ‌య‌ట‌పెట్టారు. ఆమె మాట్లాడుతూ.. ``నేను వదిలేస్తే అతడు నిస్సహాయుడ‌వుతాడు. అతడు చిన్నపిల్లాడిలా ఉంటాడు.. అది నన్ను బాధపెడుతుంది. ఆందోళనకు గురి చేస్తుంది. నేను ఒక స్నేహితుడిని కూడా వదిలి వెళ్ళలేను.. కానీ అతడు అంతకంటే ఎక్కువ. నేను దూరంగా వెళ్లాల్సిన క్షణాలు ఉన్నాయని నాకు గుర్తుంది. కానీ అత‌డి గురించి ఆందోళన చెందుతాను. అతడు తిన్నాడా లేదా? మంచం మీద సరిగ్గా ఉన్నాడా లేదా? అతడు బాగున్నాడా? అంటూ వెతుకుతాను. అతడికి నేను అవసరమని అర్థం చేసుకున్నాను. అందుకే నిర్ణ‌యం మార్చుకున్నాను`` అని చెప్పారు.
కాంబ్లి వ‌య‌సు సంబంధిత స‌మ‌స్య‌లు, అనారోగ్యాలతో బాధపడుతున్నాడు. అతడు ఆసుపత్రిలో చేరాడు. అత‌డి మెదడులో గడ్డ ఉన్న‌ట్టు నిర్ధారణ అయింది. అయితే కొన్ని రోజుల తర్వాత డిశ్చార్జ్ అయ్యాడు. ఇటీవల వినోద్ కాంబ్లి ముంబై- వాంఖడే స్టేడియం 50వ వార్షికోత్సవ వేడుకలకు హాజరయ్యారు. ఆదివారం నాడు వేడుక కోసం స్టేడియంలోకి నడవడానికి భార్య ఆండ్రియా హెవిట్ అతడికి సహాయం చేసింది. కొన్ని రోజుల క్రితం ఓ సన్మాన కార్యక్రమానికి కూడా అతడు హాజరయ్యారు. అక్కడ ముంబై క్రికెట్ అసోసియేషన్ (MCA) చాలా మంది మాజీ క్రికెటర్లకు అవార్డులు ప్రదానం చేసింది.