లోకేశ్ పంచ్‌.. కేటీఆర్ బెస్టాఫ్ ల‌క్‌

గ్రేట‌ర్ ఎన్నిక‌ల ప్ర‌చారం మ‌రింత ముదురుతోంది. ఎన్నిక‌ల ప్ర‌చారం సంద‌ర్భంగా రెండు రాష్ట్రాల ముఖ్య‌మంత్రుల వార‌సులు పోటాపోటీగా విమ‌ర్శ‌లు చేసుకుంటూ ప్ర‌చారం చేసుకోవ‌టం మ‌రింత పెరిగింది. గ్రేట‌ర్ లో త‌మ‌ను గెలిపించాలంటూ ఇద్ద‌రు అధినేత‌ల వార‌సుల ప్ర‌చారంలో భాగంగా మాట‌ల యుద్ధం మొద‌లైన సంగ‌తి తెలిసిందే. త‌మ్మి అంటూ లోకేశ్ ను కేటీఆర్ సంబోధిస్తే.. అన్నా అంటూనే కేటీఆర్‌పై పంచ్ లు వేసిన లోకేశ్ తానూ ఏమీ త‌క్కువ కాద‌న్న విష‌యాన్ని నిరూపించుకున్నారు.

వీరి మ‌ధ్య సాగుతున్న మాట‌ల యుద్ధంలో ప‌బ్లిక్ నుంచి సోష‌ల్ మీడియాకు పాకింది. తాజాగా ట్విట్ట‌ర్ సాక్షిగా వీరిద్ద‌రూ ఒక‌రినొక‌రు పంచ్ లు వేసుకోవ‌టం క‌నిపిస్తుంది. గ్రేట‌ర్ ప్ర‌చారంలో అన‌సూయ అనే మ‌హిల త‌న వాహ‌నానికి అడ్డుప‌డింద‌ని త‌న‌ను కేటీఆర్ అనుకొని.. డ‌బుల్ బెడ్ రూం ఇల్లు ఇవ్వాల‌ని కోరిందంటూ ఆమె ఫోటోను లోకేశ్ పోస్ట్ చేశారు. ఈ ట్వీట్ ను కేటీఆర్ అకౌంట్ కు లోకేశ్ ట్యాగ్ చేశారు.

దీనికి త‌గ్గ‌ని కేటీఆర్ స్పందిస్తూ.. ప‌వ‌ర్‌లో ఉన్న తాము మాత్ర‌మే డ‌బుల్‌ బెడ్‌ రూం ఇళ్లు ఇవ్వ‌గ‌ల‌మ‌ని గుర్తించినందుకు థ్యాంక్స్ అంటూ లోకేశ్ కు పంచ్ వేశారు. అన‌సూయ‌ను ఆదుకుంటామ‌ని మాట ఇచ్చారు. త‌న‌కు పంచ్ వేసే అవ‌కాశం ఇచ్చార‌న్న సంతోష‌మో.. మ‌రో కార‌ణ‌మేమో కానీ గ్రేట‌ర్ ప్ర‌చారంలో ఉన్న లోకేశ్ కు బెస్టాప్ ల‌క్ చెప్ప‌టం గ‌మ‌నార్హం. బ‌య‌టే కాదు ట్విట్ట‌ర్‌ లో మొద‌లైన ట్వీట్ల వ్య‌వ‌హారం ఎక్క‌డి వ‌ర‌కూ వెళుతుందో..?