ఇది సానియా అరుదైన ఘనతే

విజయానికి మారుపేరులా మారారు సానియా మీర్జా.. మార్టినా హింగిస్ లు. ఒక ఏడాదిలో తొమ్మిది టైటిళ్లు గెలవటానికి మించిన అద్భుతం ఇంకేం ఉంటుంది. ఇండో స్విస్ ఎక్స్ ప్రెస్ లా మారిన ఈ జోడీతో టైటిళ్లు ప్రాదాక్రాంతమవుతున్నాయి. విపరీతమైన ఫాంలో ఉన్న ఈ జంట దెబ్బకు ఒకటి తర్వాత ఒకటి చొప్పున టైటిళ్లు సొంతమవుతున్నాయి. ఏడాది చివరి టైటిల్ అయిన డబ్ల్యూటీఏ టోర్నీ ఫైనల్ లోనూ ప్రత్యర్థుల్ని చిత్తు చేయటం ద్వారా తమ జోడీకి తిరుగులేదని తేల్చేయటమే కాదు.. టైటిల్ ను సొంతం చేసుకున్నారు.

మార్టినా హింగిస్ తో జత కట్టిన తర్వాత నుంచి సానియా మీర్జా సుడి తిరిగిపోయింది. ఈ జంట ఈ ఏడాది తొమ్మిది టైటిళ్లను సొంతం చేసుకుందంటే.. ఏ స్థాయిలో ఆడారో తెలుస్తుంది. ప్రత్యర్థులు ఎవరైనా సరే.. వీరి ధాటి ముందు తలవొగ్గాల్సిందేనన్నట్లుగా తయారైంది. డబ్ల్యూటీఏ ఫైనల్ లో ఎనిమిదో సీడ్  ముగురుజ.. సురెజ్ నవారో (స్సెయిన్) జంటను వరుస సెట్లలో చిత్తు చేసి టైటిల్ ను సొంతం చేసుకున్నారు.

తాజా విజయంతో.. రెండు గ్రాండ్ స్లామ్ టైటిళ్లతో సహా మొత్తం తొమ్మిది టైటిళ్లను సానియా.. హింగిస్ జంట సొంతం చేసుకున్నట్లైంది. ఇద్దరి మధ్య అద్భుతమైన సమన్వయం.. ఒకరు ఎక్కువ.. మరొకరు తక్కువ అన్నట్లు కాకుండా కోర్టులో చెలరేగిపోయే ఈ ఇండో స్విస్ జంట ఈ ఏడాది ఆఖరి టోర్నీని తమ ఖాతాలో వేసుకొని ఘనంగా వీడ్కోలు పలికారు.

సానియా హింగిస్ జంట ఈ ఏడాది సొంతం చేసుకున్న టైటిళ్లు

1.         ఇండియన్ వెల్స్

2.         మియామి

3.         చార్లెస్టన్

4.         వింబుల్డన్

5.         యూఎస్ ఓపెన్

6.         ఫ్యామిలీ సర్కిల్

7.         వుహాన్

8.         చైనా ఓపెన్

9.         డబ్ల్యూటీఏ