చెప్పిన‌ట్లే గుండు గీయించుకున్న సింగ‌ర్‌

నిజ‌మే.. ఇస్లామిక్ మ‌త గురువు జారీ చేసిన ఓ ఫత్వాకు బాలీవుడ్ ప్ర‌ముఖ సింగర్ సోనూ నిగ‌మ్ భారీ దెబ్బ కొట్టేశారు. ఆలయాలు - మసీదుల్లో ఏర్పాటు చేస్తున్న లౌడ్ స్పీక‌ర్ల‌పై వివాదాస్పద వ్యాఖ్యలు చేయ‌డమే కాకుండా స‌ద‌రు వ్యాఖ్య‌ల‌పై విమ‌ర్శ‌లు వెల్లువెత్తినా ఏమాత్రం వెన‌క్కు త‌గ్గేది లేద‌ని ప్ర‌క‌టించిన‌ సోనూపై ఫత్వా జారీ చేసిన పశ్చిమ బెంగాల్‌ మైనారిటీ యునైటెడ్‌ కౌన్సిల్‌ ఉపాధ్యక్షుడు సయిద్‌ షా అతిఫ్‌ అలీ ఆల్ ఖాద్రి - సోనూకు గుండు కొడితే 10 లక్షల రూపాయలు ఇస్తానని ప్రకటించారు.

దీనిపై వేగంగా స్పందించిన సోనూ... గుండు గీయించుకునేందుకు సిద్ధంగానే ఉన్నాన‌ని, ద‌మ్ముంటే వెంట‌నే రావాలంటూ కూడా ప్ర‌తి స‌వాల్ విసిరారు. తన ట్వీట్లు ముస్లింలకు వ్యతిరేకంగా ఉన్నట్టు నిరూపిస్తే ఎక్కడికి రమ్మని చెబితే అక్కడకు వచ్చి క్షమాపణ చెబుతాని తెలిపారు. మసీదుల్లోని లౌడ్ స్పీక‌ర్ల‌ గురించే కాకుండా ఆలయాలు - గురుద్వారాల్లోని మైకుల గురించి కూడా ప్రస్తావించానని గుర్తు చేశారు. ఈ క్ర‌మంలో ఖాద్రి నుంచి స్పంద‌న రాక‌పోవ‌డంతో సోనూ రంగంలోకి దిగిపోయారు.

త‌న ఇంటికి మంగ‌లిని పిలిపించుకుని స్వ‌యంగా గుండు గీయించుకున్నారు. ఈ విష‌యాన్ని త‌న ట్విట్ట‌ర్ ఖాతాలో పోస్ట్ చేసిన సోనూ... గుండు గీయించుకున్న త‌ర్వాత త‌న ఫొటోల‌ను కూడా ఆయ‌న పోస్ట్ చేశారు. స‌ద‌రు పోస్ట్‌ కు సోనూ జ‌త చేసిన కామెంట్లు చూస్తే.. నిజంగానే షాకింగేన‌ని చెప్ప‌క త‌ప్ప‌దు. ఈ రోజు 2 గంట‌ల‌కు మంగ‌లిని పిలిపించుకుని గుండు గీయించుకున్నాను. నాకు గుండు గీస్తే... ఇస్తాన‌ని ప్ర‌క‌టించిన రూ.10 ల‌క్ష‌ల‌ను సిద్ధం చేసుకోండి మౌలానా గారూ  అంటూ సోనూ పోస్ట్ చేశారు.

Like Us on Facebook : https://www.facebook.com/Tupakidotcom/