బాబు అనర్గళం.. ఎంపీల నిద్రాణం..

బంటు నిద్ర.. రాజునిద్ర.. ఏదైనా ఒకటే.. నిద్రాదేవి ఆవహించాలే కానీ సమయం.. సందర్భం.. వేళా.. పాలా.. వసతులు లాంటివేమీ అక్కర్లేదు.. అలా నిద్రొచ్చిందా.. ఇలా పడుకున్నామా..? అదే జరుగుతుంది. ఇందుకు ఎవ్వరూ మినహాయింపు కాదు. మన టీడీపీ నేతలు కూడా అంత మంది ఉన్నారని.. అంతపెద్ద సభ అని.. పైగా టీడీపీ అధినేత, సీఎం చంద్రబాబు ప్రసంగిస్తున్నారని ఆలోచించలేదు. ఎంచక్కా వేదికమీదే బజ్జున్నారు.. చంద్రబాబు వేడి ప్రసంగం మధ్య.. చల్లటి పిల్లగాలికి కునుకు తీసిన నేతల కునుకుపాట్ల ఫొటోలు, వీడియోలు ఇప్పుడు హాట్ టాపిక్ గా మారాయి.

కర్నూలు జిల్లా ఎస్టీబీసీ మైదానంలో శనివారం తెలుగుదేశం పార్టీ ఆధ్వర్యంలో ధర్మపోరాట దీక్ష నిర్వహించారు. చంద్రబాబు మైక్ అందుకునే అనర్గళంగా మాట్లాడేస్తున్నారు. ఆ మన బాబే కాదా అని టీడీపీ నేతలు లైట్ తీసుకున్నారో.. లేక సోది చెబుతున్నాడని అనుకున్నారో కానీ.. మంచిగా వేదిక మీదే కూర్చున్న చోటే కునుకు తీశారు.  ఎవ్వరికీ నిద్రను కంట్రోల్ చేసుకోవడం సాధ్యం కాలేదు. టీడీపీ నేతల కునుకుపాట్లు ఇప్పుడు సోషల్ మీడియాలో వైరల్ గా మారాయి.