క్రికెట‌ర్ లాలా అమ‌ర్‌నాథ్ బ‌యోపిక్ స్టార్ ఎవ‌రు?

రాజ్‌కుమార్ హిరాణీ ప్రస్తుతం `డుంకీ` (షారూఖ్ హీరో) పోస్ట్ ప్రొడక్షన్ ప్రాసెస్‌లో నిమగ్నమై ఉన్నారు. ఈ సోషల్ కామెడీ ఎంటర్‌టైనర్ ఈ ఏడాది చివర్లో క్రిస్మస్ వారాంతంలో విడుదల కానుంది. ఇంత‌లోనే హిరాణీ తన తదుపరి ప్రాజెక్ట్ కోసం సిద్ధమవుతున్నాడు. హిరాణీ ఈసారి పాపుల‌ర్ క్రికెట‌ర్ జీవిత‌ క‌థ‌ను ఎంచుకున్నారు. ఇండిపెండెంట్ ఇండియా ప్రారంభ క్రికెట్ కెప్టెన్ లాలా అమర్‌నాథ్ బయోపిక్ ని తెర‌కెక్కిస్తార‌ని, ఈ స్పోర్ట్స్ బయోపిక్ కోసం స్టార్ ని ఫిక్స్ చేయాల్సి ఉంద‌ని క‌థ‌నాలొస్తున్నాయి. ప్ర‌స్తుతానికి ఇద్ద‌రు ప్ర‌ముఖ స్టార్లు ఈ పాత్ర కోసం పోటీలో ఉన్నార‌ని తెలుస్తోంది.

లాలా అమర్‌నాథ్ బయోపిక్‌లో పాత్ర కోసం అమీర్ ఖాన్ - రణబీర్ కపూర్ పోటీలో ఉన్నార‌ని కూడా వెల్ల‌డైంది. రాజ్‌కుమార్ హిరాణీ కాస్టింగ్ ఎంపికల శైలి విల‌క్ష‌ణ‌మైన‌ది. స్క్రిప్ట్ పూర్తయిన తర్వాత నిర్ణయం తీసుకోవాలని అత‌డు భావిస్తున్నాడు. అమీర్ లేదా రణబీర్ ల‌కు ఛాన్సుంద‌ని ప్రాజెక్ట్‌కి సన్నిహిత వ‌ర్గాలు వెల్ల‌డిస్తున్నాయి. ఆ ఇద్ద‌రికీ వీలుప‌డ‌ని ప‌క్షంలో మూడో ఆప్ష‌న్ కూడా హిరాణీ మైండ్ లో ఉంది.

నిజానికి ఈ స్క్రిప్టు తొలిగా అమీర్ వద్దకు వెళ్లింది. అతను స్క్రిప్ట్‌ను ఇష్టపడి తన ఆసక్తిని చూపించాడు. ఒకవేళ ర‌క‌ర‌కాల కార‌ణాల‌తో అమీర్ దానిని కాద‌నుకుంటే, హిరాణీ రెండ‌వ ఆప్ష‌న్ కి వెళ‌తాడు. అత‌డు తెర‌కెక్కించిన‌ చివరి బ్లాక్‌బస్టర్ `సంజూ` (సంజ‌య్ ద‌త్ బ‌యోపిక్) హీరో రణబీర్ వద్దకు వెళ్తాడు. హిరాణీ ఇప్ప‌టికే క్లుప్తంగా దాని గురించి రణబీర్‌తో మాట్లాడార‌ని కూడా హింట్ అందింది. ``అమీర్ చివరి మాట ఏమిట‌న్న‌ది తెలుసుకున్న తర్వాత అధికారికంగా ర‌ణ‌బీర్ ని సంప్రదిస్తారు`` అని తెలుస్తోంది.

లాలా అమర్‌నాథ్ బయోపిక్ స్క్రిప్ట్ దశలో ఉంది. వచ్చే ఏడాది ద్వితీయార్థంలో చిత్రీకరణ ప్రారంభిస్తారు. అమీర్ -రణబీర్ ఇద్ద‌రిలో ఎవ‌రు న‌టిస్తార‌న్న‌ది వారి అప్ప‌టి షెడ్యూల్‌పై ఆధారపడి ఉంటుంది. అమీర్ జనవరి 2024లో కొత్త చిత్రాన్ని ప్రారంభిస్తున్నాడు. రణబీర్ 2024 ప్రారంభంలో `రామాయణం`లో న‌టించే వీలుంది. ``రామాయణం చాలా ప్రీ అండ్ పోస్ట్ ప్రొడక్షన్ ఉన్న భారీ ప్రాజెక్ట్. రణబీర్ నేరుగా సెట్లలో ప్ర‌వేశించ‌డానికి ఇంకా ఎంతో స‌మ‌యం ఉండ‌దు. ఎందుకంటే క్రోమా టెక్నాలజీని ఉపయోగించి మెజారిటీ భాగం చిత్రీకరిస్తార‌ని తెలిసింది.

అమీర్‌కి తదుపరి చిత్రం మీడియం-బడ్జెట్ ప్రాజెక్ట్. మూడు నెలల్లో చిత్రీక‌ర‌ణ‌ ముగుస్తుంది. ప్రస్తుతానికి, హిరాణీ రెగ్యులర్‌గా రచయితలతో కూర్చొని లాలా అమర్‌నాథ్ కథకు తుది మెరుగులు దిద్దుతున్నారు. షారూఖ్ `డుంకీ` విడుదల తర్వాత మాత్రమే లాలా బ‌యోపిక్ కి నటీనటులను నిర్ణయిస్తారు. అయితే ఆ పాత్ర విక్కీ కౌశల్‌కు కూడా వెళ్లవచ్చని గుస‌గుస‌లు వినిపిస్తున్నాయి. అమీర్ లేదా రణబీర్‌లతో కార్యరూపం దాల్చని ప‌క్షంలో విక్కీని ఈ అవ‌కాశం వ‌రించే ఛాన్సుంద‌ని తెలుస్తోంది.