అంబానీ పెళ్లిలో ఖాన్‌ల త్ర‌యం 'నాటు నాటు'

అనంత్ అంబానీ - రాధిక మర్చంట్ ప్రీ-వెడ్డింగ్ ఉత్సవాల్లో భాగంగా పలువురు బాలీవుడ్ ప్రముఖుల డ్యాన్సింగ్ వీడియోల‌తో ఇంటర్నెట్ షేక‌వుతోంది. 3 రోజుల ఈవెంట్ లో భాగంగా రెండవ రోజు సంగీత్ నిర్వహించగా ఈ వేడుక‌లో టాలీవుడ్ స్టార్ రామ్ చ‌ర‌ణ్ ప్ర‌ధాన ఆక‌ర్ష‌ణ‌గా నిలిచారు. ఎం.ఎస్.ధోనీతో పాటు, హిందీ సినీప్ర‌ముఖుల‌తో చ‌ర‌ణ్ చాలా సంద‌డిగా దాండియా ఆడార‌ని క‌థ‌నాలొచ్చాయి. ఇక ఇదే ఈవెంట్లో ఖాన్ ల త్ర‌యం.. షారూఖ్ ఖాన్, అమీర్ ఖాన్ , సల్మాన్ ఖాన్ ఎలాంటి భేష‌జానికి పోకుండా ఆర్.ఆర్.ఆర్ 'నాటు నాటు'కు ఊర మాస్ స్టెప్పులు వేస్తూ స‌ర‌దాగా క‌నిపించారు.

అనంత్-రాధికల సంగీత్‌లో ఖాన్ ల త్ర‌యం నృత్యం ఇప్పుడు ఇంట‌ర్నెట్ ని షేక్ చేస్తోంది. బి-టౌన్‌లోని ముగ్గురు ఖాన్‌లు కొన్నాళ్ల తర్వాత ఒకచోటికి వచ్చి అతిథులను అభిమానులను ఆశ్చర్యంలో ముంచెత్తారు. ముగ్గురూ వేదికపైకి వెళ్లి తమ కిల్లర్ మూవ్స్ తో సరదా ప్రదర్శనలతో బోలెడంత ఫ‌న్ ని పంచారు. ముఖ్యంగా భార‌త‌దేశానికి ఆస్కార్ ని అందించిన‌ RRR చిత్రం నుండి నాటు నాటు పాటకు ఖాన్ ల త్ర‌యం స్టెప్పులేయ‌డంతో ఇప్పుడు ఆ వీడియో మెగా ఫ్యాన్స్ లో వైర‌ల్ గా మారింది. ద‌ర్శ‌క‌ధీరుడు రాజ‌మౌళి తెర‌కెక్కించిన ఆర్.ఆర్.ఆర్ ఏదో రూపంలో ప్ర‌పంచవ్యాప్తంగా సంద‌డి చేస్తూనే ఉంది. సినిమా విడుద‌లైన రెండేళ్ల త‌ర్వాత కూడా దీని గురించి మాట్లాడుకునేలా చేస్తోంది.

ఈవెంట్లో ఇంకా చాలా సంద‌డి ఉంది. సల్మాన్ పేటెంట్ టవల్ డ్యాన్స్ నుండి అమీర్ అప్నీ తో పాత్‌షాలా హుక్ స్టెప్ వరకు ప్ర‌తిదీ ప్రీవెడ్డింగ్ సంగీత్ కార్య‌క్ర‌మంలో హైలైట్ గా నిలిచాయి. వేదిక వ‌ద్ద ఉన్న‌ వేలాది మంది అతిథుల కోసం ఖాన్ లు అన్నింటినీ విడిచి లైట‌ర్ హార్ట్ తో ప్ర‌తిదీ చేసారు. వారు కలిసి ఐకానిక్ SRK పోజ్ ను ఇచ్చారు. బ్లాక్‌బస్టర్ హిట్ చిత్రం పఠాన్‌లోని తన పాట 'జూమ్ జో పఠాన్ 'కి SRK కిల్లర్ మూవ్స్ తో అల‌రించారు.

వేడుక‌లో ఇంకా ఎవ‌రెవ‌రు?

షారుఖ్ - గౌరీ ఖాన్ నుండి రణబీర్ కపూర్-అలియా భట్ వరకు బాలీవుడ్ క‌పుల్స్ అంబానీలు జామ్‌నగర్‌లో నిర్వహించిన ప్రీ వెడ్డింగ్ పార్టీకి తరలివచ్చారు. వేడుక‌లో మొదటి రోజు అంతర్జాతీయ సింగింగ్ సంచలనం రిహన్నా తనదైన గానంతో హుషారెత్తించింది. రెండో రోజు సంగీత్ నైట్ లో బాలీవుడ్ తారలు గ్లామర్‌ను జోడించారు. ఈ కార్యక్రమంలో జాన్వీ కపూర్, శిఖర్ పహారియా, సోనమ్ కపూర్, ఆనంద్ అహూజా, రితీష్- జెనీలియా దేశ్‌ముఖ్, టైగర్ ష్రాఫ్, అర్జున్ కపూర్, సుహానా ఖాన్, నవ్య నవేలి నందా, సారా టెండూల్కర్, కరీనా కపూర్ ఖాన్, కరిష్మా కపూర్, రాణి ముఖర్జీ, సోనాలి బింద్రే, నటాషా పూనావల్లా త‌దిత‌రుల సంద‌డి క‌నిపించింది.

సచిన్ టెండూల్కర్, రోహిత్ శర్మ, ఎంఎస్ ధోని, సైనా నెహ్వాల్, హార్దిక్ పాండ్యా వంటి భారత అథ్లెట్లు , క్రికెటర్లు కూడా అతిథులుగా విచ్చేసారు. అంతేకాకుండా బిల్ గేట్స్ , మార్క్ జుకర్‌బర్గ్ కూడా ఈ కార్యక్రమానికి వచ్చారు. అమెరికా మాజీ అధ్య‌క్షుడు ట్రంప్ కుమార్తె అంద‌మైన‌ ఇవాంకా ట్రంప్ గర్బా - దాండియా నేర్చుకుంటున్న వీడియోలు వైర‌ల్ అయ్యాయి.