వంద కోట్లే కాదు.. రికార్డులకే బాహుబలి

బాహుబలి మొదలైంది. బెనిఫిట్‌ షోను విజయవంతంగా పూర్తి చేసి.. రెగ్యులర్‌ షోలు కూడా మొదలయ్యాయి. బెనిఫిట్‌ షో ముగిసిన తర్వాత వెల్లడైన ఫీడ్‌బ్యాక్‌ పరిశీలిస్తే.. రికార్డులకు బాహుబలిగా నిలుస్తుందని చెబుతున్నారు.

తెలుగు సినిమా పరిశ్రమకు వంద కోట్ల రూపాయిల కలెక్షన్లు సాధించే సినిమా ఎప్పటికి వస్తుందన్న సంశయం బాహుబలితో తీరిపోయినట్లేనని చెబుతున్నారు. తెలుగు సినిమా చరిత్రలో అత్యధిక కలెక్షన్లు సాధించే సినిమాగా రికార్డు సృష్టించటం ఖాయమని తేలిపోయింది. సినిమాకు సంబంధించి పాజిటివ్‌ టాక్‌ జోరందుకున్న నేపథ్యంలో రూ.వంద కోట్ల మార్క్‌ కలెక్షన్లను ఈజీగా అధిగమించేస్తుందని.. ''ఐ'' సినిమాలో డైలాగు మాదిరి.. ''అంతక మించి'' అన్న మాట రికార్డు కలెక్షన్లలో ఖాయమని చెబుతున్నారు.

వంద కోట్ల క్లబ్‌ను టచ్‌ చేసిన మొదటి తెలుగు సినిమాగానే కాదు.. అత్యధిక కలెక్షన్లు సాధించిన తెలుగు సినిమాతోపాటు.. అత్యధిక థియేటర్లలో విడుదలైన సినిమాగా.. అత్యధిక కలెక్షన్లు సాధించిన హీరోగా ప్రభాస్‌.. హీరోయిన్లుగా అనుష్క.. తమన్నా.. రికార్డు కలెక్షన్లను వసూలు చేసే సినిమాకు దర్శకుడిగా రాజమౌళి నిలిచిపోవటం ఖాయమని చెబుతున్నారు. ఒక్కమాటలో చెప్పాలంటే.. తెలుగు సినిమాకు సంబంధించి రికార్డులుగా చెప్పే ప్రతి అంశంలోనూ బాహుబలి అగ్రస్థానంలో నిలుస్తుందని చెబుతున్నారు