ఫస్ట్ లుక్: విడాకులు తీసుకున్న మోస్ట్ కన్ఫ్యూజ్డ్ పర్సన్..!

'మళ్ళీరావా' తర్వాత ఆ స్థాయి సక్సెస్ కోసం ఎదురుచూస్తున్న అక్కినేని హీరో సుమంత్.. ఇప్పుడు ''మళ్ళీ మొదలైంది'' అనే సినిమాతో వస్తున్నాడు. సుమంత్ రెండో పెళ్లి వార్తలతో కావాల్సినంత పబ్లిసిటీ తెచ్చుకున్న ఈ చిత్రాన్ని ఇటీవలే అధికారికంగా ప్రకటించారు. ఫస్ట్ లుక్ పోస్టర్ ద్వారా విడాకుల తర్వాత జీవితాన్ని చూపించబోతున్నామని చెప్పి సినిమాపై ఆసక్తిని కలిగించారు. ఈ క్రమంలో ఇందులోని పాత్రలను ఒక్కొక్కటిగా పరిచయ చేస్తూ వస్తున్నారు. ఈ నేపథ్యంలో తాజాగా హీరో సుమంత్ లుక్ ని సోషల్ మీడియా వేదికగా విడుదల చేశారు.

'మళ్ళీ మొదలైంది' చిత్రంలో సుమంత్ కుమార్ అనే యువకుడిగా సుమంత్ నటిస్తున్నారు. ఇందులో గడ్డంతో గ్రీన్ టీ షర్ట్ లో ఉన్న సుమంత్.. క్లాస్ గా కనిపిస్తున్నాడు. విడాకులు తీసుకున్న మోస్ట్ కన్ఫ్యూజ్డ్ పర్సన్ గా ఈ చిత్రంలో హీరో కనిపించనున్నారని మేకర్స్ తెలిపారు. ఒంటరిగా ఉండటానికి ఇష్టపడే సుమంత్.. వంట బాగా చేస్తాడని ఈ పోస్టర్ ద్వారా వెల్లడించారు. రొమాంటిక్ కామెడీ అండ్ ఫ్యామిలీ ఎంటర్టైనర్ గా తెరకెక్కుతోన్న ఈ సినిమా అక్కినేని హీరోకి సాలిడ్ హిట్ అందిస్తుందేమో చూడాలి.

ఇకపోతే 'మళ్ళీ మొదలైంది' మూవీలో సుమంత్ సరసన నైనా గంగూలీ హీరోయిన్ గా నటిస్తోంది. సుహాసిని మ‌ణిర‌త్నం - మంజుల ఘ‌ట్ట‌మ‌నేని - వెన్నెల కిషోర్‌ - పోసాని కృష్ణ ముర‌ళి ఇతర కీల‌క పాత్ర‌లు పోషిస్తున్నారు. టీజీ కీర్తి కుమార్ ఈ చిత్రానికి దర్శకత్వం వహిస్తున్నారు. రెడ్ సినిమాస్ చరణ్ తేజ్ సమర్పణలో కె. రాజశేఖర్ రెడ్డి ఈ చిత్రాన్ని నిర్మిస్తున్నారు.

తెలుగులో ఇప్పటి వరకు చూడని సరికొత్త కథాంశంతో 'మళ్ళీ మొదలైంది' సినిమా తెరకెక్కుతోందని మేకర్స్ చెబుతున్నారు. అనుప్ రూబెన్స్ ఈ చిత్రానికి సంగీతం సమకూరుస్తున్నారు. కృష్ణ చైతన్య పాటలు రాస్తున్నారు. శివ జీఆర్ఎన్ సినిమాటోగ్రఫీ అందిస్తుండగా.. ప్రదీప్ రాఘవ్ ఎడిటింగ్ చేస్తున్నారు. అర్జున్ సురిశెట్టి ఆర్ట్ డైరెక్టర్ గా వ్యవహరిస్తున్నారు. ఇప్పటికే షూటింగ్ పూర్తి చేసుకున్న ఈ చిత్రాన్ని త్వరలోనే విడుదల చేయనున్నారు.