'ఆది పురుష్' మ్యూజిక్ డైరెక్టర్..?

పాన్ ఇండియా స్టార్ ప్రభాస్ నటిస్తున్న మైథలాజికల్ మూవీ ''ఆదిపురుష్''. రామాయణ ఇతిహాస గాథ ఆధారంగా బాలీవుడ్ డైరెక్టర్ ఓం రౌత్ 3డీ టెక్నాలజీలో ఈ చిత్రాన్ని రూపొందిస్తున్నారు. లీడ్ యాక్టర్స్ ప్రకటిస్తూ వస్తున్న మేకర్స్.. ఇప్పటి వరకు ఈ సినిమాకి సంబంధించిన సాంకేతిక నిపుణుల వివరాలను వెల్లడించలేదు. ఇప్పటికే 60 రోజులకు పైగా చిత్రీకరణ జరుపుకున్న ఈ చిత్రానికి సంగీతం ఎవరు అందిస్తున్నారనేది ఆసక్తికరంగా మారింది.

ఈ నేపథ్యంలో 'ఆదిపురుష్' చిత్రానికి బాలీవుడ్ సంగీత ద్వయం సాచెత్ తాండన్ - పరంపరా ఠాకూర్ కలిసి మ్యూజిక్ అందిస్తున్నారని టాక్ వినిపిస్తోంది. సాచెట్ - పరంపర ఇంతకముందు ప్రభాస్ 'సాహో' సినిమా కోసం ‘సైయాన్ సైకో’ పాటను స్వరపరిచారు. అలానే ఓం రౌత్ దర్శకత్వం వహించిన 'తన్హాజీ' చిత్రానికి కూడా మ్యూజిక్ అందించారు. 'కబీర్ సింగ్' 'టాయిలెట్' 'బట్టి గుల్ మీటర్' 'భూమి' వంటి హిందీ సినిమాలు ఈ సంగీత ద్వయం లిస్ట్ లో ఉన్నాయి. ఈ క్రమంలో 'ఆదిపురుష్' చిత్రానికి మ్యూజిక్ డైరెక్టర్స్ గా వ్యవహరిస్తున్నారని అంటున్నారు. ఇందులో నిజమెంతో తెలియాలంటే అధికారిక ప్రకటన వచ్చే వరకు ఆగాల్సిందే.

కాగా, 'ఆదిపురుష్' చిత్రంలో శ్రీరాముడిగా ప్రభాస్ నటిస్తుండగా.. సీత గా బాలీవుడ్ బ్యూటీ కృతి సనన్ నటిస్తోంది. రావణుడిగా బాలీవుడ్ స్టార్ సైఫ్ అలీఖాన్.. లక్ష్మణుడిగా సన్నీ సింగ్ నటిస్తున్నారు. టీ-సిరీస్ బ్యానర్‌ పై భూషణ్ కుమార్ - కృష్ణ కుమార్ - ప్రసాద్ సుతార్ - రాజేష్ నాయర్‌ - ఓం రౌత్ లు కలిసి ఈ చిత్రాన్ని భారీ బడ్జెట్ తో నిర్మిస్తున్నారు. పాన్ ఇండియా స్థాయిలో రూపొందుతున్న ఈ సినిమా వచ్చే ఏడాది ఆగస్టు 11న విడుదల కానుంది.