ఆయన చీకట్లో దీపంలా కనిపించాడు-అఖిల్

హీరోగా అరంగేట్రం చేసే ముందు అఖిల్ ఎంత డైలమాలో ఉన్నాడో అందరికీ తెలిసిందే. అఖిల్ ను లాంచ్ చేయడానికి ఏ దర్శకుడిని ఎంచుకోవాలనే విషయంలో నాగ్ చాలానే ఆలోచించాడు. అఖిల్ కూడా సైలెంటుగా కూర్చోలేదు. తన ప్రయత్నాలు తాను చేశాడు. ఆ క్రమంలో అఖిల్ ను లాంచ్ చేసే దర్శకుడిగా చాలా పేర్లు వినిపించాయి. ఇదిగో అనౌన్స్ మెంట్ రాబోతోంది అని అఖిల్ అన్నాక కూడా అక్కినేని అభిమానులు చాలా రోజులు ఎదురు చూడాల్సి వచ్చింది. ఆ తర్వాత అనుకోకుండా వినాయక్ లైన్ లోకి వచ్చి అందరికీ షాకిచ్చాడు.

బెల్లంకొండ లాంటి బ్యాగ్రౌండ్ లేని హీరోనే ఓ రేంజిలో లాంచ్ చేసిన వినాయక్ కు ‘సిసింద్రీ’గా ఏడాది వయసుకే స్టార్ ఇమేజ్ సంపాదించేసిన అఖిల్ తో ఇబ్బందేముంటుంది. అందుకే ‘అఖిల్’ సినిమాకు తిరుగులేని హైప్ వచ్చింది. ఏ అరంగేట్ర హీరోకూ లేని స్థాయిలో ‘అఖిల్’కు బిజినెస్ జరుగుతోంది. ఈ రోజు ఆడియో ఫంక్షన్ ఏర్పాట్లు నభూతో అన్న స్థాయిలో జరుగుతున్నాయి. ఈ హైప్ అంతా కాంబినేషన్ క్రేజ్ వల్ల వచ్చిందే.

ఈ సందర్భంగా వినాయక్ తో సినిమా ఎలా మొదలైందన్నదానిపై ఓ ఇంటర్వ్యూ లో మాట్లాడాడు అఖిల్. ‘‘నా తొలి సినిమా విషయంలో చాలా ఆలోచించాను. డైలమాలో పడిపోయాను. అలాంటి సమయంలో చీకట్లో ఉన్న నాకు టార్చ్ లైట్ లా కనిపించారు వినాయక్ గారు. అనుకోకుండా ఆయనో కథతో నా దగ్గరికి వచ్చారు. అది విన్నాక నాకు సరిపోయే కథ ఇదే అనిపించింది. వినాయక్ ఎప్పుడూ అభిమానుల కోసమే సినిమాలు తీస్తారు. అభిమానులకు ఏం కావాలో ఆయనకు బాగా తెలుసు. అఖిల్ సినిమాను కూడా అభిమానుల్ని ఉర్రూతలూగించేలాగే తీశారు’’ అని చెప్పాడు అఖిల్.