బిగ్‌ బాస్ ఇంటి నుంచి త‌ప్పుకునేది ఎవ‌రు?

బిగ్‌ బాస్.. ఈ రియాలిటీ షో కొంత మందికి అతిగా... కొంత మందికి వెకిలిగా.. మ‌రి కొంత మందికి డ‌బ్బు కోసం ఆడే ఆట‌గా క‌నిపిస్తోంది. అయితే మాస్ కి మాత్రం మాంచి ఎంట‌ర్ టైన్ మెంట్ కార్య‌క్ర‌మ‌మిది. స‌రిగ్గా అదే పాయింట్ టీఆర్పీకి సాయం అవుతోంది. ఇటీవ‌ల చాలా ఎపిసోడ్స్ లో ప‌స లేని టాస్క్‌ లు.. కంటెస్టెంట్ ల అరుపులు.. గిల్లిక‌జ్జాలు... వింత వింత చ‌ర్చ‌లు.. అల‌క‌లు చిత్ర విచిత్రంగా బిగ్‌ బాస్ సిరీస్ సాగుతోంద‌న్న విమ‌ర్శ‌లు వచ్చాయి. నాగార్జున బ‌ర్త్‌డే సంద‌ర్భంగా ఫ్యామిలీతో స‌హా స్పెయిన్ వెళ్లిపోవ‌డంతో కొంత జోరు త‌గ్గిన‌ట్టే అనిపించినా ఆ స్థానంలో వ‌చ్చిన ర‌మ్య‌కృష్ణ రావ‌డంతో జోష్ పెరిగింది.

ఇక ఆర‌వ వారం నాగ్ లేక‌పోవ‌డం వంటి కార‌ణాల‌తో ఎలిమినేష‌న్ ని బిగ్‌ బాస్ వాయిదా వేశాడు. అయితే నాగార్జున స్పెయిన్ నుంచి తిరిగి రావ‌డంతో ఎలిమినేష‌న్ ప్ర‌క్రియ‌ను మొద‌లుపెట్టారు. 16 మంది కంటెస్టెంట్ లతో ఈ షోని మొద‌లుపెడితే ప్ర‌స్తుతం 11 మంది వున్నారు. వీరితో పాటు వైల్డ్ కార్డ్ ఎంట్రీ ద్వారా యాంక‌ర్ శిల్పా చ‌క్ర‌వ‌ర్తి హౌజ్ లోకి ఎంట్రీ ఇవ్వ‌డంతో ఆ సంఖ్య కాస్తా 12కు చేరింది. ఇక ఆర‌వ వారం ఎలిమినేష‌న్ ప్ర‌క్రియ మొద‌లు కావ‌డంతో అప్పుడే ఒక‌రి పేరు బ‌య‌టికి లీకై నెట్టింట్లో హ‌ల్ చ‌ల్ చేస్తోంది. ఎగ్రెస్సివ్ మోడ‌ల్ అలీ ర‌జా ఎలిమినేట్ అయిన‌ట్టు తెలుస్తోంది.

హౌజ్‌లో బాగానే ఆడుతున్న అలీ ర‌జా త‌న అగ్రెసీవ్ అప్రోచ్‌.. కోపం.. షార్ట్ టెంప‌ర్‌మెంట్ కార‌ణంగా ఎలిమినేట్ అయిన‌ట్టుగా తెలుస్తోంది. దీంతో అత‌నికి తక్కువ స్థాయిలో ఓట్లు ప‌డిన‌ట్లు చెబుతున్నారు. అలీ ఎలిమినేట్ అయిన విష‌యం తెలిపిన వాళ్లంతా త‌న కోప‌మే త‌న శ‌త్రువుగా మారింద‌ని నిట్టూరుస్తున్నారు. అంతిమంగా కోపిష్టుల‌కు బిగ్ బాస్ నేర్పిన‌ పాఠం ఇదేన‌ని భావించాలేమో!