తేజు పండగ ఈవెంటుకు స్టైలిష్ స్టార్ టచ్

మెగా హీరో సాయి ధరమ్ తేజ్ - మారుతి కాంబినేషన్లో తెరకెక్కుతున్న 'ప్రతిరోజూ పండగే' ఈనెల 20 వ తారీఖున రిలీజ్ అవుతోంది.  దీంతో ఈ సినిమా ప్రమోషన్స్ జోరుగా సాగుతున్నాయి.  టీజర్.. లిరికల్ సాంగ్స్ తో సినిమాపై హైప్ పెంచే ప్రయత్నం చేస్తున్నారు.  అంతే కాకుండా 'ప్రతిరోజూ పండగే' టీమ్ కొద్ది రోజులుగా బస్సు యాత్రలో పాల్గొంటూ  ప్రేక్షకులను కలుస్తున్నారు.

సినిమా విడుదలకు ఆరు రోజులే సమయం ఉంది కాబట్టి ప్రీ రిలీజ్ ఈవెంట్ తేదీని ఖరారు చేశారు.  డిసెంబర్ 15 వ తేదీన హైదరాబాద్ లో ప్రీ రిలీజ్ ఈవెంట్ జరుగుతుందని మేకర్స్ ఇప్పటికే వెల్లడించారు.  ఇదిలా ఉంటే ఈ కార్యక్రమానికి  స్టైలిష్ స్టార్ అల్లు అర్జున్ ముఖ్యఅతిథిగా హాజరు కాబోతున్నాడని సమాచారం.  ఈ సినిమాను జీఎ2 పిక్చర్స్- యూవీ క్రియేషన్స్ వారు సంయుక్తంగా నిర్మించారు.  గీతా ఆర్ట్స్ 2 బ్యానర్ అల్లు అర్జున్ కు హోమ్ బ్యానర్ అనే సంగతి తెలిసిందే.  అందుకే ఈ సినిమాకు తనవైపు నుండి మద్దతు అందించాలనే ఉద్దేశంతో అల్లు అర్జున్ ఈ వేడుకకు హాజరవుతున్నాడట. బన్నీ కనుక ఈ వేడుకకు హాజరైతే ఈ సినిమాపై మరింత క్రేజ్ పెరగడం ఖాయం.

ఈ సినిమాలో తేజు సరసన రాశి ఖన్నా హీరోయిన్ గా నటిస్తోంది.  ఈ సినిమాలో సత్యరాజ్.. రావు రమేష్ ఇతర కీలక పాత్రల్లో నటిస్తున్నారు. థమన్ ఈ చిత్రానికి సంగీత దర్శకుడు. ఈ సినిమాతో తేజుకు దర్శకుడు మారుతి మంచి హిట్ అందిస్తాడనే అంచనాలు ఉన్నాయి. మరి ఆ అంచనాలు అందుకుంటారా లేదా అనేదో డిసెంబర్ 20 వ తారీఖునే తెలుస్తుంది