19 ఏళ్ల సుధీర్ఘ విరామం త‌రువాత

నందమూరి ఫ్యామిలీ నుంచి ఇప్ప‌టి వ‌ర‌కు చాలా మంది హీరోలు వ‌చ్చారు. స్వ‌ర్గీయ నంద‌మూరి తార‌క రామావు న‌ట‌వార‌స‌త్వాన్ని పునికిపుచ్చుకుని ఆయ‌న న‌ట‌వార‌సులుగా హ‌రికృష్ణ‌, బాల‌కృష్ణ‌, క‌ల్యాణ్ రామ్‌, ఎన్టీఆర్‌, తార‌క‌ర‌త్న హీరోలుగా ఎంట్రీ ఇచ్చారు. ఇందులో బాల‌కృష్ణ‌, క‌ల్యాణ్ రామ్‌, ఎన్టీఆర్ హీరోలుగా రాణిస్తున్నారు. ఇండ‌స్ట్రీలో మంచి గుర్తింపుని సొంతం చేసుకున్నారు. తార‌క‌ర‌త్న హీరోగా ఇప్ప‌టికీ స్ట్ర‌గుల్ అవుతూనే వున్నాడు. ఈ ఫ్యామిలీ నుంచి త్వ‌ర‌లో మ‌రో త‌రం రాబోతోంది. నంద‌మూరి బాల‌కృష్ణ త‌న‌యుడు మోక్ష‌జ్ఞ హీరోగా ఎంట్రీ ఇవ్వ‌డానికి రెడీ అవుతున్న విష‌యం తెలిసిందే.

ఇదిలా వుంటే నంద‌మూరి ఫ్యామిలీ నుంచి మ‌రో హీరో తెరంగేట్రం చేస్తున్నారు. ఆయ‌నే నంద‌మూరి చైత‌న్య కృష్ణ‌. గ‌తంలో ఒక‌టి రెండు సినిమాల్లో హీరో గా ట్రై చేశారు. కానీ అవి ఆశించిన స్థాయిలో ఆక‌ట్టుకోలేక‌పోవ‌డంతో గ‌త కొంత కాలంగా సినిమాల‌కు చైత‌న్య కృష్ణ దూరంగా వుంటూ వ‌చ్చారు. తాజాగా మ‌రో సారి హీరోగా త‌న అదృష్టాన్ని ప‌రీక్షించుకోబోతున్నారు. ఆయ‌న హీరోగా వంశీ కృష్ణ ఆకెళ్ల ద‌ర్శ‌క‌త్వంలో ఓ మూవీ తెర‌పైకి రాబోతోంది.

బ‌స‌వ‌తార‌క రామ క్రియేష‌న్స్ బ్యాన‌ర్ పై నంద‌మూరి జ‌య‌కృష్ణ ఈ మూవీని నిర్మించ‌బోతున్నారు. స్వ‌ర్గీయ నంద‌మూరి తార‌క రామారావు జ‌యంతి సంద‌ర్భంగా శ‌నివారం ఈ మూవీ ఫ‌స్ట్ లుక్ పోస్ట‌ర్ ని హీరో నంద‌మూరి బాల‌కృష్ణ విడుద‌ల చేశారు. చైత‌న్య‌కృష్ణ త‌ల‌కు క‌ట్టుతో కాఫీ తాగుతున్న ప్రీ లుక్ ని ఈ సంద‌ర్భంగా విడుద‌ల చేశారు. ఈ చిత్రానికి సంబంధించిన మ‌రిన్ని వివ‌రాల్ని త్వ‌ర‌లో వెల్ల‌డించ‌నున్నారు.

2003 లో జ‌గ‌ప‌తిబాబు హీరోగా రూపొందిన చిత్రం `ధ‌మ్‌`. రాజు ఊపాటి రూపొందించిన ఈ చిత్రంలో సోని అగ‌ర్వాల్ హీరోయిన్ గా న‌టించింది. ఈ చిత్రంలో నంద‌మూరి చైత‌న్య కృష్ణ ఓ కీల‌క పాత్ర‌లో న‌టించారు. 19 ఏళ్ల సుధీర్ఘ విరామం త‌రువాత ఆయ‌న వంశీ కృష్ణ ఆకెళ్ల ద‌ర్శ‌క‌త్వంలో కొత్త‌ సినిమాకు శ్రీ‌కారం చుట్టారు. స‌రికొత్త క‌థ‌తో రూపొందుతున్న ఈ మూవీకి సంబంధించిన మ‌రిన్ని వివ‌రాలు తెలియాల్సి వుంది. ఈ సినిమాతో అయినా నంద‌మూరి చైత‌న్య కృష్ణ యాక్టింగ్ కంటిన్యూ చేస్తారా? మ‌ళ్లీ బ్రేకిస్తారా? అన్న‌ది వేచి చూడాల్సిందే.