పవన్ సీఎం కావడం తథ్యం

పవన్ కళ్యాణ్ కు తెలుగు సినిమా పరిశ్రమలో వీరాభిమాని ఎవరు అంటే.. మరో మాట లేకుండా బండ్ల గణేష్ పేరు చెప్పేయొచ్చు. పవన్ మీద తనకున్న అభిమానాన్ని పలు సందర్భాల్లో చాటుకున్నాడు బండ్ల. పవన్ ను ఎవరైనా ఒక మాట అంటే ఊరుకోడు బండ్ల. వాళ్ల మీద యుద్ధం ప్రకటిస్తాడు. ఈ మధ్య పవన్ రాజకీయాల్లో యాక్టివ్ అవుతున్న నేపథ్యంలో ఆయనపై విమర్శల దాడి కూడా పెరుగుతోంది. ఈ నేపథ్యంలో బండ్ల స్పందించాడు. పవన్ రాజకీయాలకు పనికి రాడనే వారి మీద విరుచుకుపడ్డాడు.

‘‘అందరు రాజకీయ నాయకుల్లాగా కుంభకోణాలు చేయడం పవన్ కల్యాణ్ కు తెలియదు. ప్రాజెక్టుల్లో కమీషన్లు తీసుకోవడం కూడా తెలియదు. స్కీములు రచించడం రాదు. కానీ ప్రజ సేవ చేయాలన్న బలమైన సంకల్సం ఉంది. ప్రజా సేవ చేయాలని తపన ఉన్న వ్యక్తి.. ఆవేశంతో మంచి నిర్ణయాలు తీసుకొనే నేత రాజకీయాల్లోకి పనికిరాడా’’ అని బండ్ల ప్రశ్నించాడు. ఏదో ఒకరోజు పవన్ కల్యాణ్ సీఎం కావడం తథ్యమని.. నిజాయితీ కలిగిన పవన్ కు దేవుడు ఇచ్చే బహుమతి అదేనని బండ్ల అభిప్రాయపడ్డాడు.

పవన్ ఇబ్బందుల్లో ఉన్నపుడు తాను సాయం చేసినట్లుగా వచ్చిన వార్తలపై బండ్ల స్పందిస్తూ.. పవన్ కు ఎవరూ సాయం చేయాల్సిన పని లేదని.. చివరికి ఆ దేవుడు కూడా సాయం చేయాల్సిన పని లేదని.. ఆయన సమస్యల్ని ఆయనే పరిష్కరించుకోగలడని వ్యాఖ్యానించాడు.

Like Us on Facebook : https://www.facebook.com/Tupakidotcom/