మెగా హీరోలకు దగ్గరగా.. అల్లు హీరోలకు దూరంగా..?

ప్రముఖ నటుడు, నిర్మాత బండ్ల గణేష్ మెగా కాంపౌండ్ హీరోలతో క్లోజ్ గా ఉంటాడనే విషయం తెలిసిందే. నిన్న శుక్రవారం కొత్త సంవత్సరం సందర్భంగా బండ్ల గణేష్ మెగా హీరోలను కలిశాడు. మెగాస్టార్ చిరంజీవి - పవర్‌ స్టార్ పవన్ కల్యాణ్ - సాయి తేజ్ - వైష్ణవ్ తేజ్‌ లను కలిసి పులగుచ్ఛాలు ఇచ్చి వారికి నూతన సంవత్సర శుభాకాంక్షలు తెలిపాడు. ఆ ఫొటోలను బండ్ల తన ట్విటర్‌ లో పోస్ట్ చేశాడు. దీనిపై సినీ వర్గాల్లో రకరకాలుగా మాట్లాడుకున్నారు. ప్రొడ్యూసర్ గా కాస్త గ్యాప్ తీసుకున్న బండ్ల గణేష్.. మళ్లీ నిర్మాతగా బిజీ అయ్యేందుకు బాగా కృషి చేస్తున్నారని తెలుస్తోంది. ఈ క్రమంలో మెగా హీరోతోనే నిర్మాతగా తన రీ-ఎంట్రీని ప్లాన్ చేసుకుని వారిని కలుస్తున్నారని అంటున్నారు. అయితే ఇదే సమయంలో ఆ ఫోటోలలో అల్లు హీరోలతో కలిసినవి లేకపోవడం కూడా చర్చనీయాంశంగా మారింది.

ఇప్పటికే తన బాస్ పవన్ కల్యాణ్‌ తో ఓ సినిమా ఉంటుందని బండ్ల గణేష్ స్పష్టం చేశారు. పవన్‌ తోపాటు ఇతర మెగా హీరోలతో కూడా సినిమాలు చేసేందుకు బండ్ల గణేష్ సన్నద్ధమవుతున్నట్టు తెలుస్తోంది. అయితే నిన్న దిగిన ఫోటోలలో అల్లు కాంపౌండ్ హీరోలు మిస్ అయ్యారు. రామ్ చ‌ర‌ణ్ - వ‌రుణ్ తేజ్ లకు క‌రోనా సోకడంతో ఎవ‌రినీ క‌ల‌వ‌డంలేదు. వారిని పక్క‌న‌పెడితే బండ్ల కేవలం మెగా హీరోలని మాత్ర‌మే కలిసినట్లు అర్థం అవుతోంది. ఈ నేపథ్యంలో బండ్ల గణేష్ మెగా హీరోల‌కి మాత్ర‌మే అడ్వాన్సులు ఇస్తున్నాడని.. ఈ విధంగా మెగా హీరోలకు దగ్గరగా అల్లు హీరోలకు దూరంగా ఉంటున్నాడనే పుకార్లు షికార్లు చేస్తున్నాయి. అయితే వాస్తవానికి బండ్ల గ‌ణేశ్ నిర్మాత‌గా ఓ వెలుగు వెలుగుతున్న టైమ్ లో అల్లు అర్జున్ హీరోగా 'ఇద్ద‌ర‌మ్మాయిల‌తో' అనే సినిమా చేసాడు. మరి ఇప్పుడు సినీ వర్గాల్లో అల్లు హీరోలకు ఆయన దూరంగా ఉంటున్నాడనే కామెంట్స్ ఎందుకు వస్తున్నాయో!