అతిలోక సుందరి ఆమేనా?

విఖ్యాత తెలుగు నటుడు నందమూరి రామారావు జీవితగాథతో హీరో బాలకృష్ణ తీస్తున్న బయోపిక్ కు సంబంధించి షూటింగ్ పనులు మొదలెట్టారు. తేజ డైరెక్షన్ లో వస్తున్న ఈ మూవీకి సంబంధించి ప్రధాన పాత్రలకు నటుల ఎంపికపై గట్టి కసరత్తే చేస్తున్నారు. ఎన్టీఆర్ తో నటించిన హీరోయిన్లలో శ్రీదేవి రోల్ చాలా కీలకం. శ్రీదేవి ఎన్టీఆర్ తో బాలనటిగానూ.. తరవాత హీరోయిన్ గానూ కూడా చేసింది. చాలా హిట్ సినిమాల్లో వీళ్లిద్దరూ జంటగా కలిసి నటించారు.

ఎన్టీఆర్ బయోపిక్ లో శ్రీదేవి రోల్ కూడా కొద్దిసేపు ఉంటుంది. కామియో రోల్ తరహాలో ఉండే ఈ పాత్రకు స్టార్ హీరోయిన్ ను తీసుకునే ఆలోచన చేస్తున్నారు. ఈ రోల్ దీపికా పదుకునేతో చేయించడంపై యూనిట్ ఆలోచన చేస్తోంది. ‘‘దీపికా కూడా శ్రీదేవి లాగే సౌత్ లో పుట్టి పెరిగి బాలీవుడ్ లో సూపర్ సక్సెస్ సాధించింది. ఈ రోల్ కు ఆమె అయితే పూర్తి న్యాయం చేస్తుందనే నమ్మకం ఉంది.’’ అని చిత్ర యూనిట్ సభ్యుడొకరు తెలిపారు. త్వరలోనే దీపికాని కలిసి ఆమెను ఈ రోల్ చేసేలా ఒప్పించేందుకు సన్నాహాలు చేస్తున్నారు.  

దీపికా కెరీర్ తొలిరోజుల్లో కన్నడలో ఓ సినిమా చేసింది. బాలీవుడ్ లో సక్సెస్ కొట్టాక సౌత్ లో సినిమాలేవీ చేయలేదు. ఇప్పుడు ఆమెకు ఆఫర్ చేస్తోంది శ్రీదేవి పాత్ర కావడం... పాత్ర కూడా చిన్నదే కావడంతో ఎస్ అంటుందనే నమ్మకంతో చిత్ర యూనిట్ ఉంది. ఎన్టీఆర్ భార్య బవసతారకం పాత్రకు కూడా బాలీవుడ్ నటి విద్యాబాలన్ ను తీసుకోవడానికి ప్రయత్నాలు చేస్తున్నారు. ఎన్టీఆర్ బయోపిక్ ను హిందీలోనూ రిలీజ్ చేసే ఆలోచనలో ఉన్నారు. బాలీవుడ్ లో పేరున్న హీరోయిన్ల వల్ల హిందీ వెర్షన్ కు మరింత ఆదరణ లభిస్తుందన్నది చిత్ర యూనిట్ ఆలోచన. మరి బాలీవుడ్ బ్యూటీలిద్దరూ ఓకే అంటారా?...