ర‌క్త దాహం తీర్చుకున్న యాక్ష‌న్ క్వీన్

క్వీన్ కంగ‌న ర‌నౌత్ లోని ఫైర్ బ్రాండ్ గురించి ఎంత చెప్పినా త‌క్కువే. పురుషాధిక్య ప్ర‌పంచంపై ఒకే ఎజెండాతో నిరంత‌రం విరుచుకుప‌డుతున్న ఈ భామ పెద్ద తెర‌పైనా ఆ త‌ర‌హాలోనే చెల‌రేగిపోతోంది. మ‌ణిక‌ర్ణిక చిత్రంలో వీర‌నారిగా క‌త్తి ఝ‌లిపించింది. ఆ సినిమా బాక్సాఫీస్ ఫ‌లితం తెలిసిందే. ఆ త‌ర్వాత `జ‌డ్జిమెంట‌ల్ హై క్యా` చిత్రంలోనూ మెంట‌ల్ డిజార్డ‌ర్ తో రెచ్చిపోయే యువ‌తిగా న‌టించి షాకిచ్చింది. ఈ సినిమా బాక్సాఫీస్ వ‌ద్ద‌ విజ‌యం అందుకుంది. ప్ర‌స్తుతం `ధాక‌డ్` అనే మ‌రో భారీ యాక్ష‌న్ చిత్రంలో న‌టిస్తోంది.

ఇప్ప‌టికే ఈ మూవీ పోస్ట‌ర్లు రిలీజై ఆక‌ట్టుకున్నాయి. పోస్ట‌ర్ల‌లోనే లేడీ ర్యాంబోని త‌ల‌పిస్తూ భారీ మెషీన్ గ‌న్ తో చెల‌రేగిపోయింది. తాజాగా రిలీజైన టీజ‌ర్ లోనూ కంగ‌న ఫైరింగ్ చూస్తుంటే ర‌క్త దాహం తీర్చుకునే పిశాచిలా శ‌త్రువుపై విరుచుకుప‌డుతోందా? అనిపించ‌క మాన‌దు. ఒంటి చేత్తో మాఫియాని మ‌ట్టి కరిపించే యాక్ష‌న్ క్వీన్ గా కంగ‌న త‌న‌ని తాను వెండితెర‌పై ఆవిష్క‌రించుకుంటోంది. మాఫియా సామ్రాజ్యాన్ని అగ్నికి ఆహుతివ్వ‌డ‌మే కాదు భారీ మెషీన్ గ‌న్ తో బుల్లెట్లు దించేస్తూ త‌న క‌సిని చూపిస్తోంది. అంతేనా ముఖంపై చిందిన ర‌క్తాన్ని నాలుక‌తో టేస్ట్ చేస్తోంది. ఒక ర‌కంగా ఇది ఖాన్ లు కిలాడీల‌కే ముచ్చెమ‌ట‌లు ప‌ట్టించే ప్ర‌య‌త్న‌మా? అని సందేహం క‌ల‌గ‌కుండా ఉండ‌దు.

ప్ర‌స్తుతం ధాక‌డ్ చిత్రీక‌ర‌ణ‌లో ఉంది. ఈ సినిమా కోసం హాలీవుడ్ రేంజ్ స్టంట్ కొరియోగ్రాఫ‌ర్ల‌ను బ‌రిలో దించుతున్నార‌ట‌. రజినీష్ ఘాయ్ దర్శకత్వం వ‌హిస్తున్నారు. 2020 దీపావళి కానుకగా సినిమా విడుదల కానుంది. ఈలోగానే పోస్ట‌ర్లు.. టీజ‌ర్ల‌తో చెల‌రేగిపోతోంది క్వీన్.

Full View