ధనుష్ తో శైలజను చూశారా..

‘నేను శైలజ’ సినిమాతో తెలుగు ప్రేక్షకుల మనసు దోచింది మలయాళ కుట్టి కీర్తి సురేష్. తెలుగులో ఈ సినిమాతో హిట్టు కొట్టిన రెండు వారాలకే.. తమిళంలో ‘రజినీ మురుగన్’ మూవీతో బ్లాక్ బస్టర్ ను ఖాతాలో వేసుకుంది కీర్తి. తెలుగులో ఆమెకు వచ్చిన పేరుకు తగ్గట్లు అవకాశాలు రాలేదు కానీ.. తమిళంలో మాత్రం ఆమె చేతిలో పెద్ద పెద్ద సినిమాలే ఉన్నాయి. అందులో ఒకటి స్టార్ హీరో ధనుష్ సరసన చేసిన మూవీ. కీర్తి తమిళంలో ఓ స్టార్ హీరో సరసన చేసిన తొలి సినిమా ఇదే. తెలుగులోకి అనువాదమైన ప్రేమ ఖైదీ.. గజరాజు లాంటి సినిమాలు తీసిన ప్రభు సాల్మన్ ఈ చిత్రానికి దర్శకుడు. ఈ సినిమా ఫస్ట్ లుక్ పోస్టర్లు రిలీజ్ చేస్తూ.. టైటిల్ కూడా ప్రకటించారు.

తొడరి.. ఇదీ ధనుష్-కీర్తిల సినిమా పేరు. తొడరి అంటే ట్రైన్ అర్థం. పేరుకు తగ్గట్లే రైలు బండి మీద హీరో హీరోయిన్లు ఉన్న పోస్టర్లనే వదిలాడు ప్రభుసాల్మన్. ధనుష్ కు ఇది 30వ సినిమా కావడం విశేషం. ఈ సినిమాలో ధనుష్ తో పాటు కీర్తి కూడా సరికొత్త అవతారాల్లో కనిపిస్తున్నారు. ముఖ్యంగా కీర్తిని ఈ పోస్టర్లో చూస్తే షాకవ్వాల్సిందే. ఇందులో పల్లెటూరి అబ్బాయి.. అమ్మాయి పాత్రలు పోషిస్తున్నారు ధనుష్ - కీర్తి. ఇది ప్రభు సాల్మన్ స్టయిల్లోనే సాగే ప్యూర్ లవ్ స్టోరీ అని చెబుతున్నారు. కొంచెం ‘లైఫ్ ఆఫ్ పై’ ప్రభావం ఈ సినిమా మీద ఉందని.. సాహసోపేత సన్నివేశాలు ఉంటాయని అంటున్నారు. ఈ చిత్రాన్ని తెలుగులో కూడా ఒకేసారి విడుదల చేయాలని భావిస్తున్నారు. జూన్ నెలలో ఈ చిత్రం ప్రేక్షకుల ముందుకు రానుంది. త్వరలోనే తెలుగు వెర్షన్ ఫస్ట్ లుక్ పోస్టర్ కూడా రిలీజ్ చేస్తారట.