షారుఖ్.. చూపించి చూపించక

బాలీవుడ్ బాద్ షా షారుఖ్ ఖాన్ జోరుమీదున్నాడు. ఇంతకుముందు ఒకదాని తర్వాత ఒకటి ఆచితూచి సినిమాలు చేసిన షారుఖ్.. ఇప్పుడు ఒకేసారి మూడు సినిమాల్ని లైన్లో పెట్టాడు. ఆ మూడు.. దిల్ వాలే - ఫ్యాన్ - రాయీస్. ఏడాది వ్యవధిలో ఈ మూడు సినిమాలు ప్రేక్షకుల్ని పలకరించబోతున్నాయి. ఇందులో ముందుగా వచ్చే సినిమా.. దిల్ వాలే. ఈ ఏడాది డిసెంబరు 18న ‘దిల్ వాలే’ ప్రేక్షకుల్ని పలకరిస్తుంది.

ఈ సినిమాకు ఎన్నో ప్రత్యేకతలున్నాయి. ఆల్ టైం హిట్ పెయిర్ గా గుర్తింపు తెచ్చుకున్న షారుఖ్ - కాజోల్ మూడోసారి జత కడుతున్నారు. పైగా వీళ్లిద్దరి కాంబినేషన్ లో వచ్చిన మెగా బ్లాక్ బస్టర్ ‘దిల్ వాలే దుల్హానియా లే జాయేంగే’ టైటిల్లోని తొలి పదాన్ని ఈ సినిమాకు టైటిల్ గా పెట్టారు. షారుఖ్ కు ‘చెన్నై ఎక్స్ ప్రెస్’ లాంటి బ్లాక్ బస్టర్ హిట్టు ఇచ్చిన రోహిత్ శెట్టి మరోసారి కింగ్ ఖాన్ ను డైరెక్ట్ చేస్తున్నాడు.

‘దిల్ వాలే’ సినిమాకు సంబంధించి ఓ డిఫరెంట్ ఫస్ట్ లుక్ పోస్టర్ రిలీజ్ చేశాడు షారుఖ్. అందులో షారుఖ్ - కాజోల్ లతో పాటు సినిమాలో నటిస్తున్న మరో జంట వరుణ్ ధావన్ - కృతి సనన్ కూడా ఉన్నారు. ఐతే ఎవ్వరూ కూడా ముఖాలు చూపించలేదు. ఇది ‘హాఫ్ ఫస్ట్ లుక్ పోస్టర్’ అంటున్నాడు షారుఖ్. తన డైరెక్టర్ ఫుల్ లుక్ రిలీజ్ చేయడానికి ఒప్పుకోలేదని.. అందుకే ఆఫ్ లుక్ ఇస్తున్నామని అన్నాడు కింగ్ ఖాన్. ఈ ప్రమోషనల్ స్ట్రాటజీ బాగానే పని చేసింది. ‘దిల్ వాలే’ లుక్ సోషల్ మీడియాలో హాట్ టాపిక్ అయింది.