'వ‌కీల్ సాబ్' దర్శకుడిని చుట్టుముడుతున్న ఆఫ‌ర్లు..!

'వకీల్ సాబ్' సినిమాతో టాక్ ఆఫ్ ది టాలీవుడ్ గా మారిపోయాడు దర్శకుడు శ్రీరామ్ వేణు. 2011లో 'ఓ మై ఫ్రెండ్' సినిమాతో దర్శకుడిగా పరిచయమైన వేణు.. ఫస్ట్ సినిమాతో ప్లాప్ అందుకున్నాడు. దీంతో ఆరేళ్ళ పాటు సినిమా అవకాశాలకు దూరం కావాల్సి వచ్చింది. అయితే ఆ తర్వాత 'ఎంసీఏ' సినిమాతో మంచి సక్సెస్ సాధించాడు. ఈ క్రమంలో అల్లు అర్జున్ తో 'ఐకాన్' ప్రాజెక్ట్ అనౌన్స్ చేశాడు కానీ, అనివార్య కారణాల వల్ల అది సెట్స్ పైకి వెళ్ళలేదు. అదే సమయంలో పవర్ స్టార్ పవన్ కళ్యాణ్ సినిమా చేసే ఛాన్స్ దక్కించుకున్నాడు. దీన్ని సద్వినియోగం చేసుకున్న వేణు.. మరో సక్సెస్ ని ఖాతాలో వేసుకున్నారు. దీంతో ఇప్పుడు ఈ డైరెక్టర్ ని వరుస ఆఫ‌ర్లు తలుపు తడుతున్నాయని తెలుస్తోంది.

'వకీల్ సాబ్' సూపర్ హిట్ అవడంతో ఇప్పుడు ఇండస్ట్రీలో అందరి చూపు డైరెక్టర్ శ్రీరామ్ వేణు పై పడింది. ఇప్పటికే స్క్రిప్ట్ దశలో ఆగిపోయిన 'ఐకాన్ - కనబడుటలేదు' సినిమాని దిల్ రాజు పట్టాలెక్కించే పనిలో ఉన్నాడని టాక్ వినిపిస్తోంది. 'పుష్ప' సినిమా తర్వాత బన్నీ చేసే సినిమా ఇదే అయ్యే అవకాశాలు కనిపిస్తున్నాయి. అంతేకాకుండా ఇండస్ట్రీలో టాప్ ప్రొడ్యూసర్స్ వేణు కు అడ్వాన్సులు ఇవ్వడానికి ముందుకొస్తున్నారని తెలుస్తోంది. మ‌రోవైపున ఇండ‌స్ట్రీకి చెందిన ప్రముఖులంతా వేణు శ్రీరామ్ గురించి ట్వీట్ చేయడమే కాకుండా కాల్స్ చేసి మరీ మెచ్చుకుంటున్నారట. చిరంజీవి - నాగార్జున‌ - మ‌హేశ్ బాబు వంటి స్టార్ హీరోలు వేణు శ్రీరామ్ కి ఫోన్ చేసి సుధీర్ఘంగా మాట్లాడిన‌ట్లు సమాచారం. కంటెంట్ డ్రివెన్ క‌థ‌లో కమర్షియల్ ఎలిమెంట్స్ చ‌క్క‌గా ఇడిమేలా చేశాడంటూ ఇప్పుడు టాలీవుడ్ అంతా వేణు మీద ప్ర‌శంస‌ల జ‌ల్లు కురిపిస్తోంది. ఈ నేపథ్యంలో శ్రీరామ్ వేణు తదుపరి సినిమా ఏంటనేది ఆసక్తికరంగా మారింది.