ఇంత స్పీడేంటి గోపీచందూ?

ఆరేళ్ల పాటు సాగిన ఫ్లాపుల పరంపరకు గత ఏడాది ‘లౌక్యం’ సినిమాతో తెరదించాడు గోపీచంద్. ఆ తర్వాత వచ్చిన ‘జిల్’ సినిమా కూడా బాగానే  ఆడింది. అదయ్యాక గత నెలే సైలెంటుగా ఎ.ఎస్.రవికుమార్ చౌదరి దర్శకత్వంలో ఓ సినిమా మొదలుపెట్టాడు గోపీచంద్. సినిమా ఎంత సైలెంటుగా మొదలైందో.. షూటింగ్ కూడా అంతే సైలెంటుగా చకచకా సాగిపోయింది. నెల రోజుల్లోనే సగం సినిమా పూర్తయిపోయిందంటూ ప్రెస్ నోట్ ఇవ్వడంతో అందరికీ షాక్ తగిలింది. మరీ నెల రోజులకే సగం సినిమా అయిపోవడమేంటని అంటూ అందరూ బుర్రలు బద్దలు కొట్టుకుంటున్నారు.

గోపీచంద్ రెండు వరుస సక్సెస్ లతో ఉన్నాడు. రవికుమార్ చౌదరి కూడా గత ఏడాది ‘పిల్లా నువ్వు లేని జీవితం’తో సక్సెస్ ట్రాక్ ఎక్కాడు. రెజీనా లాంటి సక్సెస్ ఫుల్ హీరోయిన్ ను తీసుకున్నారు. గోపీచంద్ సొంత నిర్మాణ సంస్థ అనదగ్గ భవ్య క్రియేషన్స్ ‘లౌక్యం’ లాంటి హిట్టు తర్వాత నిర్మిస్తున్న సినిమా ఇది. మొత్తానికి అన్ని రకాలుగా సక్సెస్ ఫుల్ కాంబినేషన్లో తెరకెక్కుతున్న సినిమా కదా.. ఆ ఉత్సాహంలో శరవేగంగా షూటింగ్ కానిచ్చేస్తున్నట్లున్నారు. ఈ ప్రెస్ నోట్ లో సినిమా రిలీజ్ డేట్ కూడా అనౌన్స్ చేసేయడం విశేషం. క్రిస్మస్ సందర్భంగా డిసెంబరు 25న సినిమాను విడుదల చేస్తారట. గోపీచంద్, రవికుమార్ చౌదరి కాంబినేషన్ లో 11 ఏళ్ల కిందట వచ్చిన ‘యజ్నం’ అప్పట్లో ఎంత పెద్ద హిట్టయిందో తెలిసిందే. గోపీకి హీరోగా, రవికుమార్ కు దర్శకుడిగా లైఫ్ ఇచ్చిన సినిమా అది. మళ్లీ వీళ్లిద్దరూ జతకడుతున్నారంటే అంచనాలు భారీగానే ఉంటాయి.