హిట్టొచ్చినా ఇంకా సినిమా పడలేదేంటో!!

తెలుగు ఇండస్ర్టీలో అంతే.. వేడిమీదున్నపుడే పనులు చక్కబెట్టుకోవాలి. లేకపోతే జనాలే కాదు.. ఇండస్ర్టీలో వారు కూడా వెంటనే మర్చిపోతారు. ఇకపోతే మరోసారి అందరి కళ్ళూ దర్శకుడు హరీశ్‌ శంకర్‌ పై పడ్డాయ్‌. మనోడు సుబ్రమణ్యం ఫర్‌ సేల్‌ సినిమాతో ఓ పెద్ద హిట్టు కొట్టాడా అంటే.. కొట్టాడు అన్న సేపు కూడా ఆ క్రేజ్‌ నిలువలేదు. ఒక ప్రక్కన రుద్రమదేవి.. మరో ప్రక్కన బ్రూస్‌ లీ వంటి సినిమాలతో క్రేజ్‌ మొత్తం ఆవిరైపోయింది.

ఆ మధ్యన హరీశ్‌ శంకర్‌ తన తదుపరి సినిమాను ఎవరితో చేస్తున్నాడు అంటే.. రామ్‌ చరణ్‌ తో తని ఒరువన్‌ రీమేక్‌ అన్నారు. బన్నీ తో ఓ సినిమా అన్నారు. రవితేజ తో స్పెషల్‌ చబ్బీస్‌ రీమేక్‌ అని కూడా అన్నారు. కాని కట్‌ చేస్తే.. ఒక్కటంటే ఒక్కటి కూడా మెటీరియలైజ్‌ కాలేదు. చరణ్‌ ఆ సినిమాను యథావిథిగా సురేందర్‌ రెడ్డితో చేస్తున్నాడు. అలాగే రవితేజ రీమేక్‌ పై ఎలాంటి క్లారిటీ లేదు. ఎందుకంటే ప్రస్తుతం బెంగాళ్‌ టైగర్‌ హిట్టయితే కాని రవి తదుపరి నిర్ణయం తీసుకోను అన్నాడట. ఇకపోతే బన్నీ సినిమా.. ఈ సినిమాపైనే హరీశ్‌ ఆశలన్నీ.

గతంలో మనోడు స్ర్కిప్టును రిజక్టు చేసిన అల్లు అర్జున్‌.. సుబ్రమణ్యం ఫర్‌ సేల్‌ సినిమా చూసేసరికి బాగా మెచ్చేసుకున్నాడు. దానితో బన్నీకి ఒక స్టోరీ ఏదైనా చెబితే వెంటనే ఓకే చేయించుకోవచ్చు. ఒక ప్రక్కన ఎలాగైతే కొరటాల శివ ఇంతవరకు శ్రీమంతుడు రేంజ్‌ హిట్టు కొట్టి కూడా కొత్త సినిమా మొదలెట్టలేదో.. ఇంకో ప్రక్కన హరీశ్‌ శంకర్‌ కూడా అంతే.. హిట్టొచ్చినా ఇంకా సినిమా పడట్లేదు.