హరీష్.. ఆ నిర్మాతతో సమస్యేంటి?

టాలీవుడ్లో ప్రస్తుతం కథల మీద కాకుండా కాంబినేషన్ల మీదే సినిమాలు నడుస్తున్నాయని కొందరు పెద్దోళ్లు అంటుంటారు. అది అక్షరాలా నిజం. ఒకప్పుడు స్క్రిప్టు సిద్ధమయ్యాక అందుకు సరిపోయే నటీనటులెవరో చూసుకుని సినిమా మొదలుపెట్టేవారు. కానీ ఇప్పుడు ముందు కాంబినేషన్ ఓకే చేసి.. ఆ తర్వాత స్క్రిప్టు మీద దృష్టిపెడతున్నారు. శుక్రవారం పొద్దున సినిమాకు పాజిటివ్ టాక్ రావడం ఆలస్యం.. సాయంత్రానికల్లా ఆ దర్శకుడికి - ఓ స్టార్ హీరోకు ముడిపెట్టేసి అడ్వాన్స్ చేతిలో పెట్టేస్తుంటారు నిర్మాతలు. ఆ తర్వాత అనుకున్న కాంబినేషన్లు సెట్టవ్వవు. అడ్వాన్సులు వెనక్కివ్వమంటూ గొడవ.

స్టార్ డైరెక్టర్ హరీష్ శంకర్.. నిర్మాత రమేష్ పుప్పాల మధ్య ప్రస్తుతం ఇలాంటి గొడవే నడుస్తున్నట్లు సమాచారం. వీళ్లిద్దరి కాంబినేషన్లో ఇంతకుముందు ‘మిరపకాయ్’ అనే హిట్ సినిమా వచ్చింది. ఐతే ఆ సినిమా చేస్తుండగానే హరీష్ పని తనం నచ్చేసి అతడితో మూడు సినిమాలు చేయడానికి ఒప్పందం కుదుర్చుకున్నాడట రమేష్. ఐతే ఆర్.ఆర్.మూవీ మేకర్స్ తో సంబంధం ఉన్న రమేష్ పుప్పాల.. ఆ సంస్థకు సంబంధించిన వివాదాల్లో చిక్కుకుని కొంత కాలం సినిమాలకు దూరం కావాల్సి వచ్చింది. ఈ లోపు ‘గబ్బర్ సింగ్’ చేసి పెద్ద రేంజికి వెళ్లిపోయాడు హరీష్. రమేష్ వివాదాల్ని పరిష్కరించుకుని ఆ తర్వాత హరీష్ తో సినిమా కోసం ట్రై చేస్తుంటే అతను అందుబాటులోకి రావట్లేదని.. అడ్వాన్స్ కూడా వెనక్కివ్వట్లేదని ఇండస్ట్రీలో చర్చ నడుస్తోంది. బన్నీతో సినిమాకు రెడీ అవుతున్న తరుణంలో హరీష్ కు ఈ వ్యవహారం ఇబ్బందికరంగా తయారైందని అంటున్నారు. మరి ఈ వివాదాన్ని అతను ఎలా పరిష్కరించుకుంటాడో చూడాలి.