నాయుడు వస్తాడా రాడా ?

లోక నాయకుడు కమల్ హాసన్ సినిమాలకు జయాపజయాలతో సంబంధం లేకుండా ఫ్యాన్స్ ఓపెనింగ్స్ ఇస్తూనే ఉంటారు. విశ్వరూపం 2 డిజాస్టర్ అయినా ఫస్ట్ డే మాత్రం మంచి కలెక్షన్ రాబట్టుకుంది. ప్రస్తుతం ఇండియన్ 2 కోసం శంకర్ తో పని చేయడానికి రెడీ అయిన కమల్ నటుడిగా ఇదే తన చివరి సినిమా అని ప్రకటించడం అభిమానుల్లో ఇప్పటికే కలకలం రేపింది. పూర్తి స్థాయి రాజకీయాల్లో కి ఫోకస్ చేయడం కోసం ఈ నిర్ణయం తీసుకోక తప్పలేదని తనను వ్యక్తిగతంగా కలిసిన అభిమానులతో నేరుగా చెప్పేసిన కమల్ ఇండియన్ 2 ఓపెనింగ్ రోజు ఈ విషయాన్నీ అధికారికంగా ప్రకటించబోతున్నారు.

అయితే దీని కన్నా ముందు రావాల్సిన సినిమా మరొకటి ఉంది. అదే శభాష్ నాయుడు. దశావతారంలోని సిబిఐ ఆఫీసర్ శెట్టి పాత్రను స్ఫూర్తి గా తీసుకుని రూపొందించిన కథతో తయారైన ఈ మూవీకి దర్శకుడు కమల్ హాసనే  షూటింగ్ కూడా సగానికి పైగా నే పూర్తి చేసుకుంది. శృతి హాసన్ మొదటి సారి నాన్నతో కలిసి నిజ జీవిత పాత్రలో నటించింది ఇందులోనే. కాని ఇది జరుగుతున్న సమయంలోనే కమల్ మెట్ల పై నుంచి కాలు జారి కింద పడి చాలా రోజులు బెడ్ రెస్ట్ కు అంకితం కావాల్సి వచ్చింది.

అయితే పూర్తిగా కోలుకున్నాక కూడా కమల్ దాని ఊసేత్తడం లేదు. శభాష్ నాయుడులో బ్రహ్మానందం కూడా ఓ కీలక పాత్ర చేస్తున్నాడు. దాని తాలుకు షూటింగ్ లో కూడా పాల్గొన్నాడు. మరి శభాష్ నాయుడు పూర్తి చేసే ఉద్దేశం కమల్ లో ఉందో లేదో క్లారిటీ రావడం లేదు. ఇండియన్ 2 చివరి సినిమా అంటున్నారు కాబట్టి అది వచ్చే గ్యాప్ లోపు ఇదేమైనా వస్తుందేమో అని ఆశపడుతున్నారు అభిమానులు. అయితే కమల్ కు దాని మీద ఆసక్తి పోయందని పూర్తి చేసే ఉద్దేశం కూడా లేదని మరో వర్గం అంటోంది. సో నాయుడు వస్తాడా రాడా అనే భేతాళుడి ప్రశ్నకు సమాధానం ప్రస్తుతానికి లేనట్టే