నాని పంచ్.. బన్నీని ఉద్దేశించేనా?

మామూలుగా వివాదాలకు దూరంగా ఉంటాడు నాని. ఎవరినీ ఉద్దేశించి సెటైర్లు వేయడు. కానీ ఉద్దేశ పూర్వకంగా అన్నాడో లేదో కానీ.. ఓ ఇంటర్వ్యూలో భాగంగా ఇప్పుడు నాని వేసిన ఒక సెటైర్ వేశాడు. ‘దువ్వాడ జగన్నాథం’ సినిమా గురించి డివైడ్ టాక్ రావడం.. అయినప్పటికీ ఆ సినిమాకు మంచి వసూళ్లు రావడంపై పెద్ద చర్చ జరిగిన నేపథ్యంలో నాని చేసిన ఓ వ్యాఖ్య చర్చనీయాంశమవుతోంది.

ఓ ఇంటర్వ్యూలో భాగంగా మిమ్మల్ని మినిమం గ్యారెంటీ హీరో అంటున్నారే అని అడిగితే.. నాని కొంచెం అసహనంగా సమాధానం ఇచ్చాడు. సినిమాల వసూళ్ల గురించి మాత్రమే మాట్లాడటం తనకు నచ్చదని అన్నాడు. ‘‘సినిమా బాగుంటే సినిమా గురించి మాట్లాడండి. ‘సినిమా బాగాలేదు కాని  వసూళ్లు బాగున్నాయి’ అనే మాట ఈ మధ్య వినిపిస్తోంది. అలా వసూళ్ల గురించి మాత్రమే మాట్లాడటం నాకు నచ్చదు. సినిమా బాగుంటేనే జనాలు థియేటర్లకు వస్తారు’’ అని వ్యాఖ్యానించాడు నాని.

ఈ వ్యాఖ్యలు ‘దువ్వాడ జగన్నాథం’ మీద నడుస్తున్న చర్చకు సంబంధించే అని అర్థం చేసుకోవాల్సి ఉంటుంది. నాని అన్నట్లుగా ఈ మధ్య ‘సినిమా బాగాలేదు కానీ.. వసూళ్లు బాగున్నాయి’ అనే మాట వినిపించింది ‘డీజే’ విషయంలోనే. మరి ఆ సినిమా తరఫున నాని వకాల్తా పుచ్చేసుకుని ఇలా ఓ ఇంటర్వ్యూలో అసహనం వ్యక్తం చేయడం ఆశ్చర్యం కలిగించే విషయమే. సినిమా గురించి నెగెటివ్ గా మాట్లాడిన అందరి మీద ‘డీజే’ టీం గట్టిగా ఎదురు దాడి చేస్తూ విమర్శల పాలవుతున్న నేపథ్యంలో నాని వాళ్లకు సపోర్ట్ చేయాల్సిన అవసరం ఏమొచ్చిందో?