ఫోకస్‌: హిట్లున్నా సంతకాలే చేయరు

హిట్టు మీద హిట్టు కొడితే ఎవరైనా వేగం పెంచేస్తారు. కానీ ఈ భామల తీరు వేరేగా ఉంది. హిట్టొచ్చింది కాబట్టి బాధ్యత పెరిగిందని అనుకున్నారో ఏమో స్క్రిప్టుల ఎంపికలో ఆచితూచి అడుగులు వేస్తున్నారు. ఏదో అవకాశం వచ్చింది కదా! అని ఎవరికి బడితే వాళ్లకు సంతకాలు చేసేయడం లేదు. తాప్సీ, సమంత, పరిణీతి ఇలా భామలెందరో ఇదే పద్ధతిలో వెళుతున్నారిప్పుడు.

తాప్సీ గంగ సినిమాతో తెలుగు, తమిళ్‌లో బ్లాక్‌బస్టర్‌ హిట్స్‌ కొట్టింది. గంగ, కాంచన 2.. విజయాలతో ఖుషీనిచ్చినా ఈ అమ్మడు రెండు పరిశ్రమల్లోనూ ఏమాత్రం తొందరపడడం లేదు. ఇప్పటికే ఈ సినిమా రిలీజై చాలా కాలమే అయ్యింది. అయినా ఇంతవరకూ ఒక్క సినిమాకి కూడా సంతకం చేయలేదు. అలాగే అందాల సమంత సన్నాఫ్‌ సత్యమూర్తి సినిమాతో పెద్ద విజయం అందుకుంది. అయినా వేరొక సినిమాలో నటించేందుకు దాదాపు ఐదారు నెలల సమయం తీసుకుంది. తెలుగులో మహేష్‌ సరసన బ్రహ్మూెత్సవం చిత్రానికి సంతకం చేసింది. ఈ సినిమా ఇంకా సెట్స్‌కెళ్లనేలేదు. అలాగే విజయ్‌తో ఎప్పుడో కమిటైన ఓ చిత్రంలో నటిస్తోంది. అంటే తమిళ్‌లోనూ దూకుడు పెంచకుండా నెమ్మదిగానే ముందుకు వెళుతోంది.

ఇక బాలీవుడ్‌ నాయిక పరిణీతి చోప్రా కూడా ఇదే మాదిరి తాబేలు నడక నడుస్తోంది. ఈ భామ నటించిన కిల్‌ దిల్‌ ఎప్పుడో 2014లో రిలీజైంది. ఆ తర్వాత ఇప్పటివరకూ ఒక్క సినిమాకి కూడా సంతకం చేయలేదు. హిట్టుమీదున్న ఈ భామలు మరిన్ని హిట్లు కొట్టడానికి భారీ కసరత్తులు చేస్తున్నారు. ఆచితూచి అడుగులేస్తున్నారు. అందుకే ఈ ఆలస్యం అన్నమాట!