సామ్ తో దిగ్గజ ఓటీటీ చర్చలు జరుపుతోందా..?

సౌత్ స్టార్ హీరోయిన్ సమంత అక్కినేని ఓ వైపు సినిమాల్లో నటిస్తూనే మరోవైపు ఓటీటీ వరల్డ్ లో కూడా సత్తా చాటుతోంది. తెలుగు డిజిటల్ ఫ్లాట్ ఫార్మ్ 'ఆహా' కోసం 'సామ్ జామ్' అనే టాక్ షో కి హోస్టింగ్ చేసిన సామ్.. పలువురు సెలబ్రిటీలను తనదైన శైలిలో ఇంటర్వ్యూలు చేసి అలరించింది. ఈ క్రమంలో ఇప్పుడు 'ఫ్యామిలీ మ్యాన్ 2' వెబ్ సిరీస్ తో ప్రేక్షకుల ముందుకు వచ్చింది సమంత. దర్శకద్వయం రాజ్ & డీకే రూపొందించిన ఈ సిరీస్ లో సామ్ 'రాజీ' అనే ఎల్టీటీఈ సభ్యురాలిగా నటించింది.

ఇందులో సమంత నటనకు అన్ని వర్గాల ఆడియన్స్ నుంచి ప్రశంసలు దక్కుతున్నాయి. ఛాలెంజింగ్ రోల్ లో డీ గ్లామరస్ గా కనిపించిన సామ్.. యాక్షన్ సీన్స్ లోనూ అదరగొట్టింది. 'ఫ్యామిలీ మ్యాన్ 2' వెబ్ సిరీస్ తో ఇప్పుడు నేషనల్ వైడ్ క్రేజ్ తెచ్చుకుంది. దీంతో ఇప్పుడు ఆమెతో మరికొన్ని వెబ్ సిరీస్ లు రూపొందించాలని చూస్తున్నట్లు తెలుస్తోంది. ఇప్పటికే ప్రముఖ ఓటీటీ సంస్థలు సమంత డేట్స్ కోసం ప్రయత్నాలు మొదలుపెట్టినట్లు సమాచారం.

ఓటీటీ దిగ్గజం నెట్ ఫ్లిక్స్ కూడా సామ్ తో సంప్రదింపులు జరుతున్నట్లు టాక్ నడుస్తోంది. ఆమె సైడ్ నుంచి గ్రీన్ సిగ్నల్ వస్తే పాన్ ఇండియా స్థాయిలో ఓ వెబ్ సిరీస్ చేయాలని నెట్ ఫ్లిక్స్ ప్లాన్ చేస్తోంది. తెలుగు వెబ్ కంటెంట్ విషయంలో నెట్ ఫ్లిక్స్ పెద్దగా ఆట్టుకోలేకపోయిందనే చెప్పాలి. దిగ్గజ ఓటీటీ నుంచి మొట్టమొదటి తెలుగు ఆంథాలజీ సిరీస్ 'పిట్టకథలు' నిరాశపరిచింది. దీంతో ఇప్పుడు టాలీవుడ్ పాపులర్ స్టార్స్ తో సిరీస్ లు రూపొందించాలని చూస్తోందని తెలుస్తోంది. ఈ క్రమంలోనే ఇప్పుడు సామ్ తో సంప్రదింపులు జరుపుతున్నారని టాక్ నడుస్తోంది.