రెండు కోట్ల కారు గిఫ్టిచ్చిన హీరోయిన్

మిగతా హీరోయిన్లందరిదీ ఒక దారైతే తన దారి ఇంకోటని బాలీవుడ్ భామ కంగనా రనౌత్ మరోసారి రుజువు చేసింది. అంచనాలకు అందని విధంగా ప్రవర్తించే కంగనా.. మరోసారి తన ప్రత్యేకతను చాటుకుంది. మామూలుగా హీరోయిన్లకు నిర్మాతలు.. హీరోలు.. బయటి వాళ్లు ఖరీదైన బహుమతులు ఇవ్వడం గురించి రూమర్లు వస్తుంటాయి కానీ.. ఇక్కడ కంగనానే ఒకరికి రూ.2 కోట్ల విలువైన లగ్జరీ కారును బహుమతిగా ఇచ్చింది. ఆ గిఫ్ట్ ఇచ్చింది సినీ పరిశ్రమకు చెందిన వ్యక్తికి కూడా కాదు.

కంగనా హిమాచల్ ప్రదేశ్ లోని ఒక మారుమూల ప్రాంతం నుంచి హీరోయిన్ అయిపోదామని ముంబయికి వచ్చింది ఒకప్పుడు. ఆమె కుటుంబ సభ్యులు కూడా తనను ఆదుకోలేదు. వాళ్లతో గొడవపడి ఇక్కడికి వచ్చింది. ముంబయిలో ఆమెకు తెలిసిన వాళ్లు పెద్దగా లేరు. అలాంటి టైంలో అనేక ఇబ్బందులు పడి హీరోయిన్ గా సెటిలైంది. ఐతే అప్పట్లో సూర్య నారాయణ్ సింగ్ అనే వ్యక్తి జుహు బీచ్ లో జిమ్నాస్టిక్స్ నేర్పేవాడు. ఆయన దగ్గరే జిమ్నాస్టిక్స్ తో పాటు యోగా కూడా నేర్చుకుందట కంగనా. తర్వాత తర్వాత ఆమెకు ఆయనో గాడ్ ఫాదర్ లాగా మారారు. తన కెరీర్ కు సంబంధించి అనేక కీలక నిర్ణయాలు కూడా ఆయన్ని సంప్రదించే తీసుకుందట.

ఐతే హీరోయిన్ గా తిరుగులేని ఇమేజ్ సంపాదించినప్పటికీ కంగన అతడిని మరిచిపోలేదు. తన నుంచి ఏమీ ఆశించని ఆ గురువుకు ఏదైనా బహుమతి ఇవ్వాలని భావించిన కంగన.. రూ.2 కోట్ల విలువైన కారు కొని ఆయనకు అందించింది. ఆయనకు ఇంతకుముందు ఒక 2 బెడ్ రూం ఫ్లాట్ కూడా కంగన బహుమతిగా ఇచ్చినట్లు సమాచారం.

Like Us on Facebook : https://www.facebook.com/Tupakidotcom/