దీపికా గొప్ప‌ల‌పై కంగ‌నా కౌంట‌ర్‌!

తెలుగు సినిమాల్లో న‌టించేవాళ్ల‌కి - బాలీవుడ్ చిత్రాల్లో అవ‌కాశం రావ‌డం గొప్ప‌గా చెప్పుకుంటారు! బాలీవుడ్ చిత్రాల్లో ఉన్న‌వారికి ప్ర‌మోష‌న్ అంటే.. హాలీవుడ్‌! అంతేకదా.. ఒక హాలీవుడ్ సినిమాలో అవ‌కాశం రావ‌డాన్ని తార‌లు ఎంతో గొప్ప‌గా చెప్పుకుంటారు. ఎందుకంటే, ప్ర‌పంచ‌వ్యాప్తంగా గుర్తింపు వ‌స్తుంది. ఇర్ఫాన్ ఖాన్‌ - ట‌బు వంటివారికి ఎన్నో హాలీవుడ్ ఆఫ‌ర్లు వ‌చ్చాయి. త్వ‌ర‌లో ప్రియాంకా చోప్రా న‌టించిన బేవాచ్ సినిమాకి భారీ ప‌బ్లిసిటీ చేస్తున్నారు. ఈ మ‌ధ్య‌నే ట్రిపుల్ ఎక్స్ సినిమాలో టాప్ హీరో విన్ డీజిల్ ప‌క్క‌న దీపికా ప‌డుకొనే న‌టించింది! ఆ సినిమా ప్ర‌మోష‌న్ కోసం విన్ డీజిల్ ఇండియాకి రావ‌డం, దీపికాని ఆకాశానికి ఎత్తేపొగిడేయ‌డం చూశాం.

మొత్తానికి, ఆ ఒక్క సినిమాతో దీపికా ఎంతో ఖుషీగా ఉంది. ఈ సంద‌ర్భంలోనే మ‌రో హీరోయిన్ కంగ‌నా ర‌నౌత్ స్పంద‌న వేరేలా ఉంది! "హాలీవుడ్ కి నువ్వు ఎప్పుడు వెళ‌తావ్" అని అడ‌గ్గానే, కుండ‌బ‌ద్ద‌లు కొట్టిన‌ట్టు స్పందించింది కంగనా. హాలీవుడ్ సినిమాల కంటే మ‌న సినిమాలే చాలా బాగుంటున్నాయ‌ని అభిప్రాయ‌ప‌డటంతో మొదలుపెట్టిన కంగనా... జంగిల్ బుక్ మ‌న‌దేశంలో భారీ క‌లెక్ష‌న్లు రాబ‌ట్టింద‌నీ, ఆ స్థాయిలోనే మ‌న చిత్రాల‌కు థియేట‌ర్లు ల‌భిస్తే అంత‌కంటే ఎక్కువ లాభాలే తీసుకొస్తాయ‌ని అంది. ఇప్పుడు హాలీవుడ్ కు అంత సీన్ లేద‌నీ, ఓ ప‌దిహేనేళ్ల కింద‌ట అయితే గొప్ప‌గా చెప్పుకునేవార‌మనీ, డిజిట‌ల్ మీడియా వ‌చ్చేయ‌డంలో అక్క‌డ థియేట‌ర్ల వ్యాపారం చాలా దిబ్బ‌తింటోంద‌ని కంగనా చెబుతుంది.

హాలీవుడ్ కు వెళ్లే వారి జాబితాలో త‌న పేరు చేర్చుకోవ‌డం తనకు ఏమాత్రం ఇష్టం లేద‌ని సూటిగా స్పష్టం చేసిన కంగనా... ఇండియ‌న్ సినిమాకే మాంచి భ‌విష్య‌త్తు ఉంద‌ని తెగేసి చెప్పింది. ఇప్పటివరకూ.. హాలీవుడ్ కి వెళ్లొచ్చాన‌ని దీపిక ఎంతో మురిసిపోతున్న త‌రుణంలో కంగ‌నా ఇలా గాలి తీసేసిందనే అనుకోవాలి. మ‌రి, కంగ‌నా స్పంద‌న‌పై దీపికా ఏ విధంగా రెస్పాండ్ అవుతుందో వేచి చూడాలి. ఓర‌కంగా, ఈ పంచ్ ప్రియాంకా చోప్రాపై కూడా ప‌డ్డ‌ట్టే!

Like Us on Facebook : https://www.facebook.com/Tupakidotcom/