నిజమా.. నానితో కొరటాల?

నిన్నట్నుంచి టాలీవుడ్లో ఒక ఆసక్తికర రూమర్ హల్ చల్ చేస్తోంది. నేచురల్ స్టార్ నాని.. కొరటాల శివ దర్శకత్వంలో నటించబోతున్నాడన్నదే ఆ రూమర్. నాని ఇప్పటిదాకా చాలా హిట్లు కొట్టాడు కానీ.. అతడితో పెద్ద దర్శకులు పని చేసింది అరుదు. రాజమౌళితో ‘ఈగ’ చేశాడు కానీ.. అందులో అతడిది పూర్తి స్థాయి పాత్ర కాదు. మూడేళ్లుగా హిట్ల మీద హిట్లు కొడుతూ తన రేంజిని చాలా పెంచుకున్నాడు నాని. ఐతే వీటిలో చాలా వరకు నాని స్టామినా మీదే నడిచాయి. దర్శకులు చాలా వరకు అంతగా పేరు లేని వాళ్లే. పెరుగుతున్న నాని రేంజికి.. ఒక స్టార్ డైరెక్టర్ ఇమేజ్ తోడైందంటే అతను మరో స్థాయికి వెళ్లిపోవడం ఖాయం.

ఐతే పెద్ద దర్శకులెవ్వరూ నాని వైపు చూడట్లేదు. ఇప్పుడు కొరటాల కళ్లు నాని మీద పడ్డాయని.. అతడితో సినిమా చేయడానికి ఆసక్తితోనే ఉన్నాడని అంటున్నారు. ప్రస్తుతం మహేష్ బాబుతో ‘భరత్ అనే నేను’ చేస్తున్న కొరటాల.. ఆ తర్వాత ఎవరికీ కమిట్మెంట్ ఇవ్వలేదు. మళ్లీ ఎన్టీఆర్ తో ఓ సినిమా చేయాల్సి ఉన్నప్పటికీ.. తారక్ ఒకటికి రెండు కమిట్మెంట్లతో ఉన్నాడు. త్రివిక్రమ్.. రాజమౌళిల సినిమాల్లో నటించి బయటికి రావడానికి ఏడాదిన్నర దాకా సమయం పడుతుంది. ఈ లోపు కొరటాల.. నానితో సినిమా చేద్దామని చూస్తున్నట్లు సమాచారం. కొరటాల చేస్తానంటే నాని నో చెప్పే అవకాశమే లేదు. ఆల్రెడీ ఉన్న కమిట్మెంట్లు పక్కన పెట్టయినా ఈ సినిమా చేస్తాడు. ప్రస్తుతం అతను ‘కృష్ణార్జున యుద్ధం’తో పాటు నాగార్జునతో మల్టీస్టారర్ సినిమాలో నటిస్తున్న సంగతి తెలిసిందే.