అఖిల్ తర్వాత అతడితోనే..

టాలీవుడ్ లో తొలి సినిమాకే అత్యంత హైప్ తెచ్చుకున్న హీరోల్లో అఖిల్ ఒకడు. అతడి తొలి సినిమా ‘అఖిల్’ డివైడ్ టాక్ తో మొదలైనప్పటికీ.. అఖిల్ పెర్ఫామెన్స్ విషయంలో మాత్రం అందరూ ప్రశంసలు కురిపించారు. డ్యాన్సులు - ఫైట్లు - ఎనర్జీ విషయంలో అఖిల్ కు తిరుగులేదన్న కాంప్లిమెంట్స్ వచ్చాయి. మంచి డైరెక్టర్ల చేతిలో పడితే మున్ముందు నటన పరంగానూ మంచి పేరు సంపాదించగలడన్న అభిప్రాయాలు వ్యక్తమయ్యాయి. ఈ ఫీడ్ బ్యాక్ చూసి నిజంగానే ఓ మంచి డైరెక్టర్ చేతిలో పెట్టబోతున్నాడు నాగార్జున. అఖిల్ రెండో సినిమాకు క్రిష్ దర్శకత్వం వహించే అవకాశాలు మెండుగా ఉన్నాయని సమాచారం.

ఇటీవలే ‘కంచె’ సినిమాతో ప్రశంసలు అందుకున్నాడు క్రిష్. ఆ సినిమా ఫలితం చూసి క్రిష్ కు తన కొడుకును అప్పగిద్దామని వెయిట్ చేశాడు నాగ్. క్రిష్ నాగ్ నమ్మకాన్ని వమ్ము చేయలేదు. అరంగేట్రంలో మాస్ మసాలా సినిమాను ఎంచుకున్నాడు అఖిల్. ఇప్పుడిక వైవిధ్యమైన, కథా బలం ఉన్న సినిమా చేయడం అవసరం. అందుకే క్రిష్ తో చేస్తే కెరీర్ కు బాగా హెల్పవుతుంది. తొలి సినిమాతో ‘ఏవరేజ్’ అనిపించుకున్న వరుణ్ తేజ్ క్రిష్ చేతిలో పడ్డాక ఎలా తయారయ్యాడో అందరూ చూశారు. కాబట్టి అఖిల్ కు కూడా క్రిష్ బాగా ఉపయోగపడతాడనడంలో సందేహం లేదు.

ఐతే క్రిష్ కేవలం కమిట్ మెంట్ మాత్రమే ఇచ్చాడని.. కథ రెడీ చేయడానికి సమయం పడుతుందని చెప్పాడని సమాచారం. ‘బ్రూస్ లీ’ బాగా ఆడి ఉంటే అఖిల్ శ్రీను వైట్లతో సినిమా చేయాల్సింది. కానీ ఆ సినిమా రిజల్ట్ చూశాక వెనక్కి తగ్గారు. త్రివిక్రమ్ ను అడిగారు కానీ.. అతను ఖాళీ అవడానికి చాలా టైం పడుతుందన్నాడట. సరిగ్గా ఇదే సమయంలో క్రిష్ అందుబాటులోకి రావడంతో అతడితోనే సినిమా కన్ఫమ్ చేసినట్లు సమాచారం.