స్టార్ ప్రొడ్యూసర్ కొత్త సినిమా.. రతి

దేవి.. దేవీపుత్రుడు.. ఒక్కడు.. వర్షం.. నువ్వొస్తానంటే నేనొద్దంటానా.. ఈ చిత్రాల వరస చూస్తే చెప్పేయొచ్చు ఎమ్మెస్ రాజు ఎలాంటి నిర్మాతో. హీరోల్ని చూసి.. దర్శకుల్ని చూసి సినిమాలకు వెళ్లినట్లే.. నిర్మాతల్ని చూసి కూడా సినిమాలకు వెళ్లడం అన్నది ఎమ్మెస్ రాజు లాంటి వాళ్ల విషయంలోనే జరుగుతుంటుంది. ఎమ్మెస్ రాజు తర్వాత ఇలాంటి గుర్తింపు సంపాదించిన దిల్ రాజు కూడా.. తనకు ఆయనే ఆదర్శం అంటారు. అదీ ఆయనకున్న గుర్తింపు.

ఐతే ‘పౌర్ణమి’ తర్వాత ఆయన తిరోగమనం ప్రారంభమై.. వరుస ఫ్లాపులతో కనుమరుగైపోయారు. తన స్వీయ దర్శకత్వంలో కొడుకును హీరోగా పరిచయం చేస్తూ తెరకెక్కించిన ‘తూనీగ తూనీగ’ కూడా దెబ్బ తినడంతో ఇండస్ట్రీ నుంచి దాదాపుగా కనుమరుగైపోయారు రాజు. మధ్యలో ‘రమ్’ పేరుతో ఏదో హీరోయిన్ ఓరియెంటెడ్ ఫీలిం అన్నారు కానీ.. అది వర్కవుట్ కాలేదు. ఐతే ఇప్పుడు ‘రతి’ అంటూ ఓ వెరైటీ సినిమాను అనౌన్స్ చేశారు రాజు.

టైటిల్ చూస్తుంటేనే జనాలకు రకరకాల ఆలోచనలు కలుగుతున్నాయి. మామూలుగా బి-గ్రేడ్ సినిమాలకు మాత్రమే ఇలాంటి టైటిళ్లు పెడుతుంటారు. కానీ రాజు మాత్రం ఇది ఒక గొప్ప ప్రయత్నం అంటున్నారు. తెలుగు.. తమిళం.. హిందీ.. కన్నడ - మలయాళం.. మరాఠీ.. ఇలా ఆరు భాషల్లో ఈ చిత్రాన్ని తెరకెక్కించబోతున్నారట. ఇదొక ఎరోటిక్ ఎంటర్టైనర్ అని ఆయనంటున్నారు. ఇంత విరామం తర్వాత ఇలాంటి సినిమాతో రాజు పునరాగమనం చేయడం ఆశ్చర్యం కలిగించే విషయమే. ఈ ప్రాజెక్టుకు సంబంధించిన పూర్తి వివరాలు త్వరలో వెల్లడిస్తానంటున్నారు రాజు.

Like Us on Facebook : https://www.facebook.com/Tupakidotcom/