మంచు ఫ్యామిలీ ఎక్కడబ్బా?

టాలీవుడ్లోని బడా ఫ్యామిలీస్‌ లో మంచు కుటుంబం ఒకటి. ఆ కుటుంబం నుంచి ఒకరిని నలుగురు ఇండస్ట్రీలో ఉన్నారు. ఒకప్పుడు మోహన్ బాబు తెలుగు సినిమాల్లో వైభవం చూశారు. హీరోగా.. క్యారెక్టర్ ఆర్టిస్టుగా.. విలన్ గా.. అద్భుతమైన పాత్రలతో తెలుగు సినిమాపై తనదైన ముద్ర వేశారు. కానీ మోహన్ బాబు ఘన వారసత్వాన్ని నిలబెట్డడంలో ఆయన సంతానం విఫలమైంది. మంచు విష్ణు.. మంచు మనోజ్.. మంచు లక్ష్మీప్రసన్న.. ఈ ముగ్గురూ సినీ రంగ ప్రవేశం చేశారు. వరుసబెట్టి సినిమాలు చేశారు. కానీ ఈ ముగ్గురికీ ఎక్కువగా చేదు అనుభవాలే ఎదురయ్యాయి. ఐతే ఎదురు దెబ్బలు తగులుతున్నా ముగ్గురూ సినిమాలు మాత్రం మానలేదు. ఒకదాని తర్వాత ఇంకో ప్రాజెక్టు లైన్లో పెడుతూనే కనిపించారు. గతంతో పోలిస్తే సినిమాలు తగ్గించేసిన మోహన్ బాబు కూడా సొంత బేనర్లో అప్పుడప్పుడూ ఒక చిత్రం చేసేవాడు.

కానీ ఈ మధ్య మంచు ఫ్యామిలీ పూర్తిగా దూకుడు తగ్గించేసింది. టాలీవుడ్లో వీళ్ల సందడే కనిపించడం లేదు. ‘గాయత్రి’ తర్వాత మోహన్ బాబు సినిమాలే చేసే ఉద్దేశంతో కనిపించడం లేదు. ఆయన సంగతలా వదిలేస్తే ఇంతకుముందు వరుస బెట్టి సినిమాలు చేసిన మంచు విష్ణు.. మంచు మనోజ్ కూడా సైలెంటైపోయారు. మనోజ్ పూర్తిగా సినిమాలు వదిలేసి.. సేవా కార్యక్రమాల్లో బిజీ అయిపోయాడు. అతను రాజకీయాలపై దృష్టిపెడుతున్నట్లు కూడా వార్తలొస్తున్నాయి. మంచు విష్ణు ‘ఓటర్’ అనే సినిమా చేస్తున్నాడు కానీ.. దాని గురించి న్యూసే లేదు. అసలు ఆ సినిమా రిలీజవుతుందా లేదా అన్న సందేహాలు కలుగుతున్నాయి. షూటింగ్ అప్ డేట్స్ కూడా ఏమీ ఇవ్వట్లేదు. ఇక ‘వైఫ్ ఆఫ్ రామ్’తో కంగుతిన్న మంచు లక్ష్మి కూడా కొత్తగా ఏ సినిమా చేస్తున్నట్లు లేదు. తమిళంలో మాత్రం ‘కాట్రిన్ మొళి’ అనే సినిమాలో అతిథి పాత్ర చేసింది. ఈ ముగ్గురూ సామాజిక మాధ్యమాల్లో కూడా దూకుడు తగ్గించారు. మంచు ఫ్యామిలీకి ఫెయిల్యూర్లు కొత్త కాదు. కానీ ఎప్పుడూ వాళ్లు దూకుడు తగ్గించలేదు. కానీ ఈ మధ్య ఉన్నట్లుండి అందరూ ఎందుకు సైలెంటైపోయారో మరి?